Një konflikt mes disa të miturve është shënuar këtë të mërkurë në zonën e Kombinatit në Tiranë.
Siç bëhet me dije nga Policia e Tiranës, në konflikt janë përfshirë 28 shtetas të mitur, disa prej të cilëve posedonin armë të ftohta/ mjete të mprehta të llojit thikë, që më pas janë sekuestruar.
Në bazë të informacionit, shërbimet e Policisë kanë lokalizuar në rrugën “Llambi Bonata”, disa të mitur të ndarë në grupe, të cilët dyshohet se do të konfliktoheshin me njëri-tjetrin. Shërbimet e Policisë kanë ndërhyrë menjëherë dhe i kanë shoqëruar të miturit, në ambientet e Komisariatit të Policisë Nr. 6. Gjatë kontrollit fizik, disa prej tyre iu gjetën armë të ftohta (thika), kaçavida, si dhe disa maska, të cilat janë sekuestruar në cilësinë e provës materiale. Veprimet procedurale me të miturit u kryen në prani të prindërve dhe psikologëve dhe pas komunikimit me prokurorin, nisi procedimi në gjendje të lirë për 28 shtetas të mitur, të moshave 13-17 vjeç. Materialet procedurale iu referuan Prokurorisë, për veprime të mëtejshme./CNA Lajme ekskluzive nga CNA
Doni te informoheni te paret per lajme ekskluzive? Bashkohuni me grupin tone ne Facebook duke klikuar ketu.