Barcelona nuk po e fsheh më pozicionin e saj në garën për Topin e Artë. Klubi katalanas ka nisur të dalë hapur në mbështetje të Lamine Yamal, duke e promovuar 19-vjeçarin si një nga pretendentët kryesorë për çmimin individual më prestigjioz në futboll.
Pas paraqitjes së shkëlqyer në fitoren 5-0 ndaj Valencias, në ambientet e klubit u diskutua edhe mundësia që Yamal të dilte vetë para mediave në prag të sfidës me Feyenoordin. Interesi u shtua edhe më shumë pas konferencës së Kylian Mbappé, duke i dhënë tjetër dimension rivalitetit mes dy prej emrave kryesorë të kësaj gare.
Vetë Yamal u tregua i matur kur u pyet për Topin e Artë. “Kam bërë një vit të madh, me klubin tim dhe me Kombëtaren”, deklaroi ai, duke lënë të kuptohet se nuk ka ndërmend të kërkojë vota apo të bëjë fushatë për veten.
Barcelona, megjithatë, duket se po mendon ndryshe. Klubi dëshiron ta shndërrojë kandidaturën e talentit të tij në një nga historitë kryesore të sezonit. Në krah të Yamalit është pozicionuar edhe Rodri, fituesi i Topit të Artë në vitin 2024.
CV-ja e 19-vjeçarit është tashmë e mbushur me trofe individualë. Yamal ka fituar Golden Boy në 2024, ndërsa ka marrë edhe dy çmime Kopa, në 2024 dhe 2025. Ai është gjithashtu MVP aktual i La Ligës.
Mbështetja nga Barcelona u bë edhe më e dukshme pas ndeshjes me Feyenoordin, ku trajneri Hansi Flick nuk la vend për dyshime: “Sigurisht që e meriton Topin e Artë; këtë mund ta shohë kushdo”.
Yamal vjen pas një sezoni ku ka qenë protagonist edhe me Spanjën, duke lënë gjurmë në skenën ndërkombëtare dhe duke dhënë kontribut në momentet e rëndësishme të ekipit kombëtar.
Barcelona duket se e ka bërë zgjedhjen e saj. Tani mbetet të shihet nëse fushata e katalanasve do ta çojë Yamalin drejt Topit të Artë të parë në karrierë, në ceremoninë e 26 tetorit në Londër.