Partia Demokratikje po zhvillon sot Foltoren e Ripërtëritjes në Elbasan, ku është i pranishëm dhe kryedemokrati, Sali Berisha. Ky i fundit ka mbajtur fjalën e tij para qytetarëve të pranishëm, ku foli lidhur me situatën aktuale në vend.
Sipas Berishës, qytetarët shqiptarë po përballen me varfëri ekstreme, ndërsa shtoi se pensionistët me pensionet që kanë nuk blejnë dot ilacce për mjekim. “Sot në Elbasan dhe në Shqipëri, kemi atë numër lindjesh që kishim 100 vite më parë, në kohë kur ishim më pak se 1 milion. Pra, vjedhjet e tmerrshme të këtij regjimi, organizatat e krimit dhe droga e tij, kanë qenë shkatërrimtare për kombin tonë më shumë se gjithçka tjetër.
Sot, jo në një, por në disa aspekte, qytetarët e Elbasanit dhe të Shqipërisë përballen po me atë varfëri që u përballën në periudhën e hiperkolektivizmit. Dallimi atëherë është ky: se atëherë dyqanet ishin bosh, nuk kishin ç'të blinin, kurse sot dyqanet janë plot por xhepat bosh. Dhe nuk arrijnë dot pensionistët, të cilët janë jo pak po janë më shumë se një e treta e tyre që kanë shkrirë jetën për të qenë ne këtu ku jemi, dhe ata, në mënyrë absolute, nuk blejnë dot ilaçet për mjekim”, tha Berisha. Ai u shpreh ndër të tjera se gjendja aktuale në Shqipëri kërkon ndërhyrje të menjëhershme dhe theksoi se për këtë është e nevojshme ripërtëritja e PD-së. “Nuk ka tokë dhe vend më të begatë se Shqipëria në çdo aspekt. Por të gjitha këto janë shndërruar në një mënyrë apo në një tjetër, në mallkim për qytetarin shqiptar. Janë shndërruar në parajsë për qeveritarë të pangopur dhe hajdutë, të cilët në mënyrë identike me ata që shtypën shqiptarët 46 vite, urrejnë qytetarin. Mund të listojmë një listë të pafundme të problemeve të jashtëzakonshme të rënda që përballet qytetari, për shëndetin e tij, për shkollimin e fëmijëve.
U ndala në këtë paraqitje për të theksuar se sirenat e nevojës për rithemelimit të Shqipërisë bien në të katër anët e vendit. Shqipëria realisht ngjet me një të sëmurë në sallën e urgjencës. Ngjan me një të sëmurë në sallën e urgjencës i cili kërkon ndërhyrje të menjëhershme. Ndaj dhe ripërtëritja e Partisë Demokratike është jetike dhe përcaktuese për ripërtëritjen e Shqipërisë”, u shpreh kryedemokrati. Berisha foli më tej edhe për ndarjen e re territoriale, ku tha se projekti i PD-së, parashikon shtimin e të paktën 40 bashkive, në mënyrë që sipas tij qytetari të jetë më afër pushtetit. "Nuk kanë asnjë interes qytetarët për të shtënë Shqipërinë të tërën në dorë në reformën territoriale, në vend se të korrigjohen gabimet shumë të mëdha që u bënë, po thellohen më tej duke hequr edhe 15 bashki të tjera, në qarkun e Elbasanit 3 bashki të cilat janë absolutisht funksionale, të suksesshme në interes të qytetarëve. Pra, nuk kanë interes tjetër, përveç pushtetit të tyre. Ne kemi një projekt. Projekti ynë është publik. Ne jo që nuk heqim bashki, por ne shtojmë të paktën edhe 40 bashki, dhe këtu në qarkun e Elbasanit dhe në çdo qark të Shqipërisë, në mënyrë që qytetarët të jenë sa më afër pushtetit.
Duke përfunduar, u bëj thirrje ju, u bëj thirrje qytetarëve të Elbasanit dhe të mbarë Shqipërisë, të vendosur dhe me guxim t'i japim përgjigjen përfundimtare këtij regjimi që s'meriton të qëndrojë në pushtet asnjë ditë. Asgjë, asgjë s'do të ndalojë dot opozitën shqiptare, Partinë Demokratike, pa përmbysur këtë diktaturë që bazohet në krimin, drogën dhe vjedhjen e shqiptarëve", tha Berisha. /CNA Lajme ekskluzive nga CNA
Doni te informoheni te paret per lajme ekskluzive? Bashkohuni me grupin tone ne Facebook duke klikuar ketu.