Pas vendimit të Ministrisë së Infrastrukturës për të nisur procedurat e zgjidhjes së kontratës koncesionare të Aeroportit Ndërkombëtar të Vlorës pasi skaduan afatet e përfundimit të punës, kompania MABCO e biznesmenit Behgjet Pacolli paralajmëron se çështjen do e çojë në arbitrazh ndërkombëtar. Në një reagim në Facebook, Pacolli shkruan se deri më tani nuk ka marrë asnjë njoftim zyrtar nga Ministra për nisjen e procedurës për zgjidhjen e kontratës duke akuzuar shtetin shqiptar se po zgjedh vetë rrugën e arbitrazhit. “Për një investim strategjik me rëndësi kombëtare, është e papranueshme që investitori të informohet nga mediat dhe jo nga institucionet shtetërore. Nëse ky lajm rezulton i vërtetë, atëherë shteti shqiptar po zgjedh me vetëdije rrugën e arbitrazhit ndërkombëtar. MABCO ka bërë çdo përpjekje për ta shmangur këtë skenar dhe për të gjetur një zgjidhje institucionale”, thuhet në deklaratën e Pacollit. LEXO edhe...Vonesat në përfundimin e aeroportit të Vlorës, Qeveria nis procedurën për anulimin e kontratës koncesionare Pacolli thotë se kompania ka bërë përpjekje për një zgjidhje institucionale, por flet për një paradoks, duke akuzuar institucionet se fillimisht penguan përfundimin e projektit dhe tani po përdorin pikërisht këto vonesa si argument për zgjidhjen e kontratës. "Ky arbitrazh do të jetë pasojë e drejtpërdrejtë e neglizhencës, veprimeve të kundërligjshme dhe papërgjegjshmërisë së disa përfaqësuesve të institucioneve shtetërore, e veprimeve të elementëve që, nën mbulesën e institucioneve, kanë vepruar jashtë ligjit, si dhe e dështimit të një sistemi drejtësie të ndikuar për të garantuar zbatimin e ligjit dhe mbrojtjen e të drejtave të investitorit", shkruan Pacolli. MABCO pretendon se ka investuar mbi 320 milionë euro në projekt dhe se kishte përmbushur pothuajse të gjitha detyrimet kontraktore, duke qenë vetëm pak hapa larg fazës së certifikimit të aeroportit. Por, Pacolli shkruan se ndonëse Gjykata e Lartë i ktheu Mabco Constructions SA të drejtën e administrimit të aeroportit, kompanisë ju pengua hyrja në kantier për muaj me radhë pas përplasjes me punonjësit e ortakut Valon Ademi. "Pas vendimit të Gjykatës së Lartë, grupe që veprojnë në mënyrë arbitrare dhe jashtë ligjit, me mbështetje ose tolerim institucional, penguan MABCO-n të hynte në kantier dhe të përfnte projektin. Për muaj të tërë, në prani të Policisë së Shtetit, investitori u mbajt jashtë pronës së tij, ndërsa pajisje me vlerë u dëmtuan, u shkatërruan dhe një pjesë edhe u vodhën", thekson Pacolli. Puna në Aeroportin e Vlorës ishte parashikuar të përfnte në muajin shkurt të vitit 2026. Pasi kjo nuk u arrit, kontrata parashikonte edhe një afat 90 ditor për përfundimin e punimeve. Duke qenë se edhe pas këtij afati 90-ditor përfundimi i punimeve nuk u arrit, për shkak të mosmarrëveshjeve të 2 kompanive koncesionare, 'MABCO' të drejtuar nga biznesmeni Behgjet Pacolli dhe 2A Group të drejtuar nga Valon Ademi, në muajin maj ministri Enea Karakaçi vendosi një ultimatum 30 ditor për zgjidhjen e mosmarrëveshjeve. Pavarësisht ultimatumit të Karakaçit, mosmarrëveshjet mes 2 kompanive filluan të thelloheshin, ç'ka çoi edhe në nisjen e procedurave të anulimit të kontratës koncesionare, gjë që është e parashikuar edhe në pikën 15.4 shkronja D e kontratës, në seksionin për zgjidhjen e parakohshme të kontratës. Reagimi i plotë i Behgjet Pacolli Sot Ministria e Infrastrukturës dhe Energjisë ka nisur procedurën për zgjidhjen e Kontratës së Koncesionit të Aeroportit Ndërkombëtar të Vlorës. Deri në këtë moment, MABCO Constructions SA nuk ka marrë asnjë njoftim zyrtar nga Autoriteti Kontraktor. Për një investim strategjik me rëndësi kombëtare, është e papranueshme që investitori të informohet nga mediat dhe jo nga institucionet shtetërore. Nëse ky lajm rezulton i vërtetë, atëherë shteti shqiptar po zgjedh me vetëdije rrugën e arbitrazhit ndërkombëtar. MABCO ka bërë çdo përpjekje për ta shmangur këtë skenar dhe për të gjetur një zgjidhje institucionale. Fatkeqësisht, përballë papërgjegjshmërisë, heshtjes dhe veprimeve të paligjshme të disa përfaqësuesve shtetërorë, çdo mundësi për zgjidhje është mbyllur . Ky arbitrazh do të jetë pasojë e drejtpërdrejtë e neglizhencës, veprimeve të kundërligjshme dhe papërgjegjshmërisë së disa përfaqësuesve të institucioneve shtetërore, e veprimeve të elementëve që, nën mbulesën e institucioneve, kanë vepruar jashtë ligjit, si dhe e dështimit të një sistemi drejtësie të ndikuar për të garantuar zbatimin e ligjit dhe mbrojtjen e të drejtave të investitorit. Nuk kam dëshiruar kurrë që taksapaguesit shqiptarë të paguajnë faturën e neglizhencës, papërgjegjshmërisë dhe vendimeve të paligjshme të zyrtarëve që sot vazhdojnë të sillen me indiferencë, sepse ata nuk mbajnë asnjë përgjegjësi personale. Dëmin nuk e paguajnë ata, por qytetarët shqiptarë dhe biznesi. MABCO është ekspozuar financiarisht me mbi 320 milionë euro, pa përfshirë humbjen e fitimit dhe kostot ligjore. Kompania kishte përfunduar pothuajse të gjitha detyrimet kontraktore dhe ndodhej vetëm pak para fazës së certifikimit të aeroportit. Megjithatë, pas vendimit të Gjykatës së Lartë, grupe që veprojnë në mënyrë arbitrare dhe jashtë ligjit, me mbështetje ose tolerim institucional, penguan MABCO-n të hynte në kantier dhe të përfnte projektin. Për muaj të tërë, në prani të Policisë së Shtetit, investitori u mbajt jashtë pronës së tij, ndërsa pajisje me vlerë u dëmtuan, u shkatërruan dhe një pjesë edhe u vodhën. Paradoksi është i qartë: nga njëra anë institucionet penguan përfundimin e projektit, ndërsa nga ana tjetër kërkojnë ta përdorin këtë pengesë si arsye për zgjidhjen e kontratës. Kjo bie ndesh me vendimin e Gjykatës së Lartë, me Kontratën e Koncesionit, me Marrëveshjen Dypalëshe për Mbrojtjen e Investimeve ndërmjet Zvicrës dhe Shqipërisë dhe me parimin universal të së drejtës se askush nuk mund të përfitojë nga sjellja e vet e paligjshme. Nëse procedura konfirmohet, MABCO do të mbrojë të drejtat e saj me të gjitha mjetet juridike, përfshirë provat dhe faktet qe posedon kundër secilit qe ka shkaktuar këtë skandal të turpshëm e deri të ARBITRAZHI tregtar ndërkombëtar kundër Republikës së Shqipërisë. Ky nuk është një kërcënim. Është pasoja juridike e veprimeve joligjore dhe mosveprimeve të papërgjegjshme të përfaqësuesve të institucioneve shtetërore. SI.E./ReportTv.al aeroporti i vlores behgjet pacolli Mabco Constructions SA valon ademi 2A Group Komento Komente Sondazhi i ditës: Reforma territoriale, cili opsion ju pëlqen më shumë? 46 bashki (PS) 57.2% 100 bashki (PD) 16% 61 bashki (si sot) 26.8% Vota total: 6139 Sondazhi i ditës: Reforma territoriale, cili opsion ju pëlqen më shumë?
