Rama me Gellért Jászai Furtuna mbi ‘4iG’ mbërrin deri te ‘One Albania’/ Takimet e Jászai-t në Tiranë dhe pikëpyetjet për të ardhmen Në Budapest po hapen dosjet. Në Tiranë, vetëm pak kohë më parë, hapej dera e Kryeministrisë.
Në mes të të dyjave është Gellért Jászai, njeriu që ndërtoi një prej perandorive më të mëdha të biznesit të epokës së Viktor Orbán dhe që përmes 4iG kontrollon në Shqipëri One Albania.
Zhvillimet e kësaj të hëne në Hungari kanë ndryshuar ndjeshëm panoramën për grupin. Qeveria e Péter Magyar ka nisur një kontroll të gjerë të marrëdhënieve kontraktuale, financiare dhe pronësore mes shtetit hungarez dhe 4iG, duke vendosur nën lupë mënyrën se si kompania u rrit me shpejtësi marramendëse gjatë viteve të Orbán. “4iG një përbindësh”, Péter Magyar ‘shpartallon’ kompaninë mëmë të ‘One Albania’: Do t’i marrim çdo qindarkë!
17 Gusht, 19:20 Dhe reagimi i tregut ishte brutal. Aksionet e 4iG ranë me rreth 14.5 për qind vetëm gjatë së hënës, ndërsa kompania ka humbur një pjesë të konsiderueshme të vlerës së saj në bursë.
Por për Shqipërinë historia nuk përfn në bursën e Budapestit.
Sepse vetëm pak kohë përpara se qeveria hungareze të hapte dosjet e 4iG, Jászai kishte qenë në Tiranë.
Dhe kishte takuar Edi Ramën.
Një takim që Tirana nuk e tregoi
Vizita e Jászai-t në Kryeministri merr sot një peshë tjetër. Jo sepse ekziston ndonjë provë se takimi lidhej me hetimet që do të nisnin më vonë në Hungari. Një lidhje e tillë nuk është dokumentuar.
Por për shkak të asaj që u diskutua. Takimi nuk u bë publik nga qeveria shqiptare. Detajet u mësuan nga pala hungareze dhe nga deklarimet e vetë Jászai-t.
Dhe nuk bëhej fjalë thjesht për One Albania. Në tavolinë ishin vendosur investime të tjera strategjike të 4iG në Shqipëri: infrastruktura dixhitale, qendrat e të dhënave dhe projekti EAGLE, kablli nëndetar që synon të lidhë Egjiptin me Shqipërinë dhe prej këtu me Europën.
Pra, ndërsa modeli mbi të cilin 4iG ndërtoi fuqinë e tij në Hungari po vihet sot nën kontroll nga qeveria e re, në Shqipëri Jászai ka diskutuar mundësinë për të zgjeruar më tej gjurmën e grupit.
Ky kontrast është pikërisht ai që e bën takimin e Tiranës të rëndësishëm sot.
Në Budapest kontrollojnë miliardat, në Tiranë diskutohen investime të reja
Péter Magyar nuk ka urdhëruar një kontroll rutinë. Katër ministri do të përfshihen në verifikimin e marrëdhënieve të 4iG me shtetin hungarez.
Në qendër janë qindra miliarda forinta financime, kontrata shtetërore dhe disa prej transaksioneve më të mëdha që e kthyen 4iG nga një kompani informatike relativisht e vogël në një konglomerat telekomunikacioni, teknologjie, mbrojtjeje dhe hapësire.
Do të kontrollohet blerja e Vodafone Hungary, financimet dhe garancitë shtetërore, Antenna Hungária, marrëdhëniet me Ministrinë e Mbrojtjes dhe programet satelitore.
Magyar pretendon se bëhet fjalë në total për “shumë mijëra miliardë forinta” para publike.
Ai e ka përshkruar 4iG me një gjuhë jashtëzakonisht të ashpër, si një nga simbolet e sistemit ekonomik të ndërtuar gjatë qeverisjes së Orbán.
Këto janë akuza politike që tashmë duhet të provohen nga kontrollet dhe, nëse dalin elemente penale, nga organet kompetente.
Por Magyar ka dhënë edhe një paralajmërim që bëhet veçanërisht interesant kur shihet nga Tirana.
Ai u ka kërkuar drejtuesve dhe pronarëve të 4iG dhe kompanive të tjera të lidhura me sistemin e vjetër që të mos tentojnë të “nxjerrin, transferojnë apo zhdukin” para dhe asete.
Nuk ka të dhëna publike që One Albania apo investimet shqiptare të 4iG të jenë objekt i këtij dyshimi.
Por paralajmërimi e bën legjitime një pyetje: a do të kërkojnë autoritetet hungareze të ndjekin edhe lëvizjet financiare të grupit jashtë Hungarisë?
One Albania, pjesa shqiptare e perandorisë
Kjo është pika ku historia e Budapestit bëhet edhe histori shqiptare. One Albania nuk është një kompani e shkëputur nga problemet e pronarit të saj. Ajo është pjesë e strukturës së telekomunikacionit të 4iG dhe një prej aseteve më të rëndësishme të grupit jashtë Hungarisë.
Në të njëjtën kohë, kompania shqiptare është e ekspozuar ndaj sistemit bankar vendas.
Vetëm pak javë më parë është nënshkruar një financim në rangun e rreth 40 milionë eurove, sipas të dhënave të siguruara për këtë shkrim.
Kjo e bën çështjen më të gjerë sesa fati personal i Jászai-t. Nëse kontrolli në Hungari përfn vetëm me verifikimin dhe certifikimin e kontratave, presioni i sotëm mund të rezultojë kalimtar.
Por nëse qeveria Magyar kalon në anulime kontratash, rikuperim fondesh, kallëzime penale dhe ndërprerje të mekanizmave financiarë që kanë mbështetur 4iG, atëherë ekuacioni ndryshon.
Dhe pyetja është e thjeshtë: sa e mbrojtur është One Albania nga një goditje financiare ndaj kompanisë mëmë?
Jászai kërkoi më shumë se One Albania
Në këtë moment merr kuptim edhe përmbajtja e takimit me Ramën. Jászai nuk shkoi në Kryeministri për të diskutuar vetëm performancën e operatorit celular.
Ai foli për zgjerim.
Një nga projektet ishte EAGLE, kablli nëndetar mes Egjiptit dhe Shqipërisë, që 4iG e konsideron një korridor strategjik për transmetimin e të dhënave drejt Europës.
Por edhe më interesante është fusha tjetër e diskutuar: Data Center-at.
Qendrat e të dhënave janë sot një nga asetet më strategjike të ekonomisë dixhitale. Inteligjenca artificiale, cloud computing, shërbimet publike dhe kompanitë private varen gjithnjë e më shumë nga infrastruktura ku ruhen dhe përpunohen të dhënat.
Dhe pikërisht në këtë sektor Jászai i ka shprehur Ramës interesin për investime të reja në Shqipëri.
Këtu qeveria shqiptare ka detyrimin të jetë shumë më transparente sesa ishte me vetë takimin.
Çfarë konkretisht kërkoi 4iG?
A kërkohen prona shtetërore, lehtësi fiskale, garanci, kontrata publike apo forma të tjera mbështetjeje?
A do të përfshihen të dhëna apo sisteme të institucioneve publike?
A ka nisur ndonjë procedurë konkrete pas takimit Rama-Jászai?
Dhe mbi të gjitha, a ka bërë qeveria shqiptare një vlerësim financiar dhe reputacional të grupit me të cilin po diskuton infrastrukturë strategjike?
Këto pyetje marrin sot një rëndësi tjetër.
Heshtja e Tiranës
Problemi nuk është se një kryeministër takohet me një investitor të madh të huaj. Kjo është pjesë normale e detyrës së një qeverie.
Problemi është mungesa e transparencës kur diskutohen investime që mund të prekin infrastrukturë strategjike.
Në këtë rast, publiku shqiptar nuk e mësoi nga qeveria e tij se Jászai kishte qenë në zyrën e kryeministrit.
E mësoi nga pala tjetër.
Sot, kur qeveria e vendit nga vjen investitori ka nisur të kontrollojë mënyrën se si ky grup u financua, si mori asete shtetërore dhe si siguroi kontrata publike, heshtja e Tiranës bëhet edhe më problematike.
Sepse Shqipëria nuk po diskuton me 4iG vetëm për shitjen e paketave telefonike.
Po diskutohet për infrastrukturë dixhitale.
Për kabllo ndërkombëtare.
Për Data Center-a.
Dhe potencialisht për investime që do të qëndrojnë këtu për dekada.
Nga zyra e Ramës te dosjet e Budapestit
Jászai hyri në zyrën e Edi Ramës me plane për më shumë investime në Shqipëri.
Sot, në Budapest, qeveria po hap dosjet e kompanisë së tij.
Ky është një ndryshim dramatik rrethanash dhe kërkon që Tirana të mos sillet sikur asgjë nuk ka ndodhur.
Nëse qeveria shqiptare po negocion projekte të reja me 4iG, publiku duhet të dijë se çfarë po negociohet, çfarë angazhimesh janë marrë dhe nëse janë ofruar garanci apo përfitime nga shteti shqiptar.
Nëse One Albania ka marrë financime të konsiderueshme nga bankat shqiptare, duhet parë edhe niveli real i ekspozimit të saj dhe marrëdhëniet financiare me kompanitë e tjera të grupit.
Dhe nëse 4iG kërkon të hyjë në infrastrukturë edhe më strategjike, autoritetet shqiptare duhet të shpjegojnë se çfarë kontrollesh kanë kryer mbi investitorin.
Sepse sot historia nuk është më vetëm se një miliarder hungarez takoi kryeministrin shqiptar.
Historia është se një grup që në Tiranë kërkon të zgjerojë kontrollin mbi asete të rëndësishme dixhitale, në vendin e tij po përballet me një kontroll të paprecedentë mbi miliarda të ardhura nga marrëdhëniet me shtetin.
Në Budapest po kërkohet të zbulohet se si u ndërtua perandoria e Jászai-t.
Në Tiranë, pyetja është nëse kjo perandori do të lejohet të zgjerohet më tej — dhe me çfarë garancish për interesin publik shqiptar. /Pamfletione albania gellért jászai rama Lini një Përgjigje Anuloje përgjigjen Anti-Mafia Shqipëria drejt rihapjes së basteve online: Mundësi, pikëpyetje dhe kritika për transparencën 17 Gusht 2026, 16:5116:51Anti-Mafia Qeveria hungareze nis hetim zyrtar për 4iG, çfarë do të ndodhë me One Albania? 16 Gusht 2026, 14:4514:45Anti-Mafia Baste ilegale, call-center, trafik droge dhe tenderë/ Kush fshihet pas Shkëlzen Betaj, ish nr.2 i Hipotekës qe do financojë 5 kulla nga Tirana ne Velipojë? 15 Gusht 2026, 12:4012:40Anti-Mafia Dosja e Gjuhadolit, projekti para ekspertizës dhe licenca e refuzuar; çfarë i duhet të shpjegojë ministrit Blendi Gonxhe 14 Gusht 2026, 08:3708:37Anti-Mafia Etleva Shkoza (Çoka) merr leje për kulla 30 kate; kush fshihet pas arkitektes me 3 mbiemra? 13 Gusht 2026, 17:4017:40Anti-Mafia Kryetari i KPP, Ismail Shehu delegon kompetencat 10 ditë pas emërimit, modeli i ministrave për t'i shpëtuar SPAK-ut 13 Gusht 2026, 10:5010:50Anti-Mafia