Krahasimi mes Sali Berishës dhe Edi Ramës është, sipas kreut të PD-së, një nga mënyrat më të forta të propagandës politike kundër opozitës. Gjatë një interviste në emisionin “Now” me Erla Mëhillin në Euronews Albania, Berisha kundërshtoi idenë se ai dhe kryeministri kanë ndjekur të njëjtën rrugë politike, duke sjellë në vëmendje vendimet që ka marrë gjatë karrierës së tij. Për të argumentuar këtë qëndrim, ish-kryeministri u ndal te largimi i tij nga posti i Presidentit të Republikës, dorëheqja nga pushteti dhe periudhat kur, sipas tij, ka pranuar të tërhiqet nga skena politike.
Berisha e cilësoi krahasimin me Ramën si një përpjekje për të krijuar një perceptim të rremë te publiku. Ai tha se kjo mënyrë komunikimi nuk sjell asgjë të re në debatin politik, por e konsideroi atë një gabim të rëndë.
Në vijim, kreu i demokratëve kujtoi periudhën pas dorëheqjes nga Presidenca, kur PD-ja, sipas tij, ndodhej në një situatë të vështirë politike. Ai pretendoi se arriti ta rimëkëmbte partinë dhe të largonte përmes votës kundërshtarët që kishin ardhur në pushtet me armë.
Një tjetër argument që Berisha përdori për të bërë dallimin mes qeverisjes së tij dhe asaj të Ramës ishte funksionimi i institucioneve. Duke iu referuar viteve 2005-2013, ai deklaroi se gjatë mandatit të tij është zbatuar parimi i ndarjes së pushteteve, të cilin e cilësoi si një nga themelet e demokracisë.
“Arma strategjike propagandistike më e rrezikshme është arma e barazimit, e krahasimit të pakrahasueshmes midis nesh dhe Edi Ramës. Midis Partisë Socialiste dhe Partisë Demokratike”, deklaroi Berisha.
Ai shtoi se pretendimi se të dy politikanët janë të njëjtë përbën, sipas tij, një mashtrim të madh, duke përsëritur se historia e tij politike përfshin dorëheqje dhe largime nga pushteti. Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm