Spanja ka marrë masa të reja për të kontrolluar kufirin në enklavën e saj të Afrikës së Veriut, Ceuta, pas një vale të paprecedentë kalimesh të migrantëve nga Maroku, ku raportohet se kanë humbur jetën të paktën 67 persona. Autoritetet spanjolle njoftuan se gjatë ditëve të fundit rreth 50 mijë persona tentuan të hynin në Ceuta, një nga kufijtë e vetëm tokësorë të Bashkimit Evropian me kontinentin afrikan. Kalimet janë kryer si përmes detit, me mjete lundruese të improvizuara, ashtu edhe nga toka, duke tentuar kapërcimin e barrierave kufitare. Pas ndërhyrjes së autoriteteve, mbi 48 mijë migrantë janë kthyer në Marok brenda 48 orëve, sipas qeverisë spanjolle. Për të parandaluar hyrjet e reja, Garda Civile spanjolle ka vendosur një barrierë lundruese rreth 500 metra të gjatë në zonën e Tarajalit, një nga pikat më të përdorura për kalimet ilegale. Barriera është projektuar të qëndrojë disa dhjetëra centimetra mbi sipërfaqen e ujit dhe të shtrihet edhe nën të, duke lejuar vetëm kalimin e mjeteve të patrullimit të autoriteteve. Ndërkohë, situata ka shkaktuar një bilanc tragjik. Sipas zyrtarëve spanjollë, të paktën 67 trupa janë gjetur në anën spanjolle të kufirit. Disa migrantë dyshohet se janë mbytur gjatë përpjekjeve për të kaluar me not, ndërsa të tjerë kanë humbur jetën duke u rrëzuar nga barrierat mbrojtëse.
Mes migrantëve që tentuan kalimin ishte edhe Muxhahid Ahmed nga Sudani, i cili tha se preferonte të qëndronte në Spanjë sesa të kthehej në një vend të përfshirë nga konflikti.
“Një ditë pashë në rrjetet sociale video të mijëra migrantëve që shkonin drejt Spanjës dhe vendosa ta provoj edhe unë. Nëse më kthejnë, duhet të më çojnë në Sudan, por si mund të kthehet dikush në një vend ku ka luftë?”, u shpreh ai.
Edhe shumë të rinj të tjerë kanë treguar se rrjetet sociale kanë ndikuar në vendimin e tyre për të ndërmarrë udhëtimin e rrezikshëm. Ayoub El Abiad, një 16-vjeçar maroken, tha se kishte parë video në Instagram me migrantë që kalonin në Ceuta dhe vendosi të provonte së bashku me kushëririn e tij.
“Migrimi është për të përmirësuar jetën tonë”, tha ai.
Ndërkohë, autoritetet spanjolle vijojnë operacionet e kontrollit në kufi, ndërsa organizatat humanitare kanë ngritur shqetësime për numrin e lartë të viktimave dhe kushtet e rënda me të cilat përballen migrantët gjatë përpjekjeve për të arritur në territorin e Bashkimit Evropian. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb Etiketa: emigrante Marok spanje