“Nëse vazhdohet me këtë ritëm, një luftë mes nesh dhe jush është absolutisht e pashmangshme.” Kështu shprehet Sergey Markov, një nga zërat më të ashpër të kampit pro luftës në Rusi dhe ish-këshilltar për politikën e jashtme i Vladimir Putin nga viti 2011 deri në 2019. Edhe pse më vonë u shpall “agjent i huaj”, ai vazhdon të japë leksione për gjeopolitikën dhe të mbajë lidhje me qarqet e Kremlinit. “Po ecim mbi një fill shumë të hollë”, thotë ai në një intervistë për Corriere della Sera-n Ku mund të çojë kjo armiqësi gjithnjë e më e madhe mes Rusisë dhe Europës? LEXO edhe...‘Enver Hoxha ka mbështetur gjeneralin Glebov, ndërsa Shehu ministrin sovjetik në Shqipëri, Chuvakin’! Dokumentet e panjohura të CIA-s “Një ditë më parë, në një intervistë paradoksale, ministri i Jashtëm Sergey Lavrov u pyet pse Rusia mashtrohet gjithmonë. Ai u përgjigj: ‘Ne kemi gjithmonë besim se maskarenjtë nuk mund të jenë plotësisht maskarenj.’ Kur në Rusi të krijohet bindja se në anën tjetër janë të gjithë të tillë, atëherë, sipas mendimit tim, nuk do të ketë më kthim pas.” Janë vetëm fjalë apo mund të pasohen edhe nga veprime? “Europa mendon se po ndjek strategjinë kineze të një mijë hapave: të mos kalojë asnjë vijë të kuqe të Rusisë me një veprim të vetëm, por t’i copëzojë ato në shumë pjesë dhe t’i kalojë gradualisht. Me fjalë të tjera, është si të ziesh një bretkosë me zjarr të ngadaltë. Është një strategji që bazohet në akuza që ne i konsiderojmë të pajustifikuara dhe në provokime, duke u nisur nga ideja se Rusia nuk do të reagojë konkretisht. Por nëse Europa vazhdon në këtë rrugë përshkallëzimi, kam frikë se një formë lufte do të bëhet e pashmangshme.” A do të ketë guximin Putin të sulmojë një shtet anëtar të NATO-s? “Do të detyrohet të përgjigjet, sepse në fakt Europa tashmë po sulmon Rusinë. Perëndimi ka shënjestruar tashmë disa anije ruse që transportonin lëndë të para dhe Bashkimi Europian ka vendosur se është e mundur të sekuestrohet nafta ruse. Rusia do të përgjigjet dhe Putin ka thënë se edhe ne do të godasim anijet e kundërshtarëve kudo në oqeane. Skenari më realist është që ne të bllokojmë ngushticat në Detin Baltik. Ekziston edhe një skenar tjetër, më pak i mundshëm, por jo i pamundur: Rusia mund të godasë, si në territorin ukrainas ashtu edhe gjetkë, fabrikat që do të prodhojnë dronë me të cilët do të vriten qindra mijëra rusë. Siç e dini, kjo mundësi është përmendur tashmë edhe në lidhje me Britaninë e Madhe.” Si e vlerësoni emërimin e ish-ministrit ukrainas të Mbrojtjes, Fedorov, si këshilltar në Ministrinë italiane? “Nga këndvështrimi italian është një vendim i arsyeshëm, sepse pa dyshim Fedorov është një profesionist i nivelit të lartë, i specializuar në organizimin e luftës me dronë. Për ministrin Crosetto është një përforcim i mirë. Nuk është në interesin tonë, por është e pamundur të mohohet se është një zgjedhje racionale.” Si e përjetojnë këtë armiqësi mes Europës dhe Rusisë qytetarët e zakonshëm, intelektualët dhe elita ekonomike ruse? “Qytetarët e zakonshëm, pra shumica e rusëve, e shohin këtë si diçka normale. Ideja e përgjithshme është se periudha kur kishim marrëdhënie miqësore me Europën ishte një përjashtim, sepse Europa është një armik që gjithmonë ka plane për të shkatërruar Rusinë. Intelektualët janë thellësisht të zhgënjyer, sepse e shohin Europën si një model jetese dhe shpresojnë që një ditë marrëdhëniet e mira të rikthehen. Edhe sipërmarrësit, pra oligarkët, janë të zhgënjyer, por ndryshe nga intelektualët, ata besojnë se marrëdhëniet e dikurshme nuk do të rikthehen më, të paktën jo gjatë jetës së tyre. Për të gjithë, nuk ekziston një shpjegim racional për sjelljen e Europës. Këtë pyetje ia kam bërë edhe ministrit të Jashtëm Sergey Lavrov, i cili më tha se nuk gjen asnjë përgjigje.” A do ta përballojë Rusia një luftë të gjatë konsumimi në Ukrainë? “Absolutisht po. Nëse situata përkeqësohet, masat do të shtrëngohen edhe më shumë. Do të forcohen prirjet autoritare, si në politikë ashtu edhe në ekonomi. Pak ditë më parë, presidenti nënshkroi një dekret që i jep shtetit të drejtën jo të shtetëzojë kompanitë, por të vendosë administrim të përkohshëm mbi ato që nuk mbrohen siç duhet nga sulmet me dronë dhe raketa. Ky është një nga shembujt e kësaj qasjeje. Sa i përket radhëve në pikat e karburantit, popullsia nuk proteston, por për këto vështirësi fajëson Europën. Ajo që ju nuk arrini të pranoni është se shumica dërrmuese e njerëzve, edhe pse nuk janë të lumtur me situatën, nuk i konsiderojnë autoritetet ruse si fajtorët kryesorë për gjendjen aktuale.” Çfarë domethënie kishte vizita në Moskë e drejtorit të CIA-s? “Sipas mendimit tim, Donald Trump nuk do të merret në një të ardhme të afërt me çështjen e Ukrainës. Për të ekzistonte rreziku që të përfshihej në një luftë bërthamore me Rusinë dhe ai e zgjidhi këtë përmes uljes së tensioneve. Gjithashtu shmangu shpenzime edhe më të mëdha nga buxheti amerikan për luftën në Ukrainë. Prandaj, sipas meje, vizita e drejtorit të CIA-s nuk kishte të bënte me Ukrainën. Trump nuk merret më me problemet e të tjerëve, sepse ka mjaftueshëm problemet e veta.” Çfarë pret Putin nga këto zgjedhje? “Slogani jozyrtar është: të gjithë duhet të qëndrojnë në vendet e tyre. Rusia ka shumë probleme dhe mirëkuptimi me partitë pak a shumë opozitare është ky: ju nuk duhet të përfitoni nga kjo periudhë për të na sulmuar për çështje të ndjeshme, si për shembull kriza e karburantit, ndërsa ne ju garantojmë pjesën tuaj të vogël të pushtetit.”/CorrieredellaSera U.D/ReportTv.al vladimir putin Rusi nato Europë donald trump CIA Komento Komente Sondazhi i ditës: Bashkia e Tiranës pa drejtues në zyrë, kush e ka përgjegjësinë? Politika 29.5% Drejtësia 67.6% Nuk e di 2.9% Vota total: 105 Sondazhi i ditës: Bashkia e Tiranës pa drejtues në zyrë, kush e ka përgjegjësinë?
