Edi Rama po përballet me sfidën më të madhe të 13 viteve të tij në pushtet, ndërsa studentët kërkojnë dorëheqjen e kryeministrit dhe akuzojnë qeverinë për korrupsion... Gazeta britanike Financial Times i ka kushtuar një artikull zhvillimeve në Shqipëri, ku protestat kundër projektit të Jared Kushnerit, dhëndrit të presidentit amerikan Donald Trump, kanë marrë përmasa të tjera dhe janë kthyer në një përballje të drejtpërdrejtë me qeverinë e Edi Ramës.
Sipas FT, ajo që nisi si një kundërshtim ndaj ndërtimit të një resorti luksoz në bregdetin shqiptar, për shkak të shqetësimeve për dëmtimin e mjedisit, është shndërruar në një lëvizje më të gjerë kundër korrupsionit dhe politikave të qeverisë.
Studentët kanë sulmuar ndërtesa qeveritare dhe janë përplasur me policinë në Tiranë dhe qytete të tjera, duke kërkuar dorëheqjen e kryeministrit, uljen e tarifave universitare dhe përmirësimin e kushteve në arsim.
Financial Times shkruan se protestave studentore u janë bashkuar edhe nxënës të shkollave të mesme, pavarësisht thirrjeve të autoriteteve që prindërit t'i mbajnë fëmijët larg demonstratave.
Për katër ditë radhazi, policia ka përdorur gaz lotsjellës dhe ujë me presion për të shpërndarë protestuesit në kryeqytet.
Por ajo që e bën këtë zhvillim politikisht më të rëndësishëm është lidhja e protestave studentore me lëvizjen që nisi në muajin maj kundër projektit të Jared Kushnerit.
Sipas gazetës britanike, projekti prej 4 miliardë dollarësh, i parashikuar në bregdetin shqiptar pranë ishullit të Sazanit, ka shkaktuar kundërshtime për shkak të ndikimit të mundshëm në një zonë natyrore ku jetojnë edhe flamingot.
Zhvilluesit e projektit pretendojnë se investimi do të respektojë mjedisin, por kundërshtarët e tij kanë vazhduar protestat, të cilat më pas morën emrin "Revolucioni i Flamingove".
Kjo lëvizje, sipas Financial Times, ka bashkuar kërkesat për mbrojtjen e mjedisit me akuzat për korrupsion dhe pakënaqësitë ndaj qeverisjes së Edi Ramës.
Ndërkohë, kryeministri nuk ka pranuar të diskutojë dorëheqjen.
Në një video të publikuar në Facebook, Rama i ka cilësuar protestat si rezultat të ndikimit të "duarve të huaja", pa identifikuar se cilët aktorë qëndrojnë pas tyre.
"Si mund të nxiten të miturit të vendosin maska, të shkulin kalldrëmin dhe të sulmojnë policinë?", ka deklaruar Rama, sipas citimit të Financial Times.
Kryeministri ka tentuar gjithashtu t'i lidhë trazirat me procesin e integrimit europian të Shqipërisë, duke pretenduar se përplasjet nuk po ndodhin rastësisht në një moment kur vendi po përparon në negociatat me Bashkimin Europian.
"A mendoni se është rastësi që pikërisht kur Shqipëria merr një tjetër dritë jeshile, kur mbyll një tjetër kapitull negociatash, kur i afrohet atij objektivi historik, këtu shpërthejnë flakët? Nuk është aspak rastësi", ka deklaruar Rama.
Financial Times e vendos këtë përballje në kontekstin e diskutimeve të drejtuesve europianë për zgjerimin e BE-së dhe përparimin e Shqipërisë në procesin e anëtarësimit.
Por gazeta britanike sjell edhe vlerësimin e Mario Bikarskit, analist i lartë në kompaninë ndërkombëtare të inteligjencës së riskut Verisk Maplecroft, sipas të cilit protestat përbëjnë sfidën më të madhe politike për Ramën gjatë 13 viteve në pushtet.
Megjithatë, Bikarski nuk parashikon që ato ta rrëzojnë menjëherë kryeministrin apo të bllokojnë procesin e integrimit europian.
Sipas tij, në Shqipëri ekziston një konsensus i gjerë në favor të anëtarësimit në Bashkimin Europian, ndërsa opozita nuk gëzon besimin e protestuesve.
"Opozita është po aq e pabesueshme për protestuesit dhe aktualisht është e vështirë të shihet një alternativë ndaj një qeverie Rama", shprehet analisti për Financial Times.
Pikërisht këtu qëndron edhe kontradikta politike që del nga analiza e gazetës britanike. Protestat po i krijojnë Edi Ramës presionin më të madh të viteve të fundit, por mosbesimi ndaj opozitës nuk po e kthen automatikisht këtë pakënaqësi në një alternativë qeverisëse.
Bikarski vlerëson se Rama mund të detyrohet të bëjë lëshime përballë protestuesve, përfshirë edhe braktisjen e projektit turistik shumë miliardë dollarësh në bregdetin shqiptar.
Financial Times kujton se kryeministri ka treguar aftësi për t'u mbijetuar krizave të mëparshme politike, por këtë herë përballet me një lëvizje që bashkon kërkesa studentore, kundërshtimin e investimit të Kushnerit dhe akuzat për korrupsion.
Nëse kjo lëvizje do ta detyrojë Ramën të tërhiqet nga projekti i Sazanit apo të bëjë ndryshime në politikat e qeverisë, mbetet për t'u parë.
Për momentin, sipas analizës së Financial Times, protestat kanë krijuar sfidën më serioze për kryeministrin, por ende jo një alternativë politike që mund ta zëvendësojë. /Përshtati Pamfleti/ rama studente revolta Lini një Përgjigje Anuloje përgjigjen Politike Edi Rama përballë revoltës së studentëve, mijëra në sheshe e rrugë kundër kryeministrit 16 Tetor 2026, 19:5819:58Politike Revolta kundër Ramës/ Nga studentët te pensionistët, çfarë i bashkon protestuesit në Tiranë? 16 Tetor 2026, 19:3119:31Politike 156 të lënduar nga protestat, ministri Demo apel prindërve: Mbajini fëmijët larg dhunës politike 16 Tetor 2026, 18:3618:36Politike Berisha thirrje qytetarëve: Mbështesni protestën, gjimnazistët dhe studentët kanë nevojë për çdo shqiptar 16 Tetor 2026, 18:1518:15Politike Elisa Spiropali letër Edi Ramës: Mos u fshih më, çoje vendin në zgjedhje! 16 Tetor 2026, 17:5217:52Politike “Non grata” në Uashington, VIP në Dallas/ Kush ia hapi dyert Berishës te njerëzit e Trumpit? 16 Tetor 2026, 17:2217:22Politike