Ish-drejtoresha e AKSHI-t, Mirlinda Karçanaj, është paraqitur këtë të martë në Prokurorinë e Posaçme (SPAK), në kuadër të hetimeve për aferën e tenderave të AKSHI-t. Karçanaj, ndaj së cilës është caktuar masa “detyrim paraqitje”, pasi më herët kishte qenë në “arrest shtëpie”, është një nga 8 personat nën masë sigurie në këtë dosje. Gjykata e Lartë kishte lehtësuar masën e saj të sigurisë.
SPAK po heton procedurat e 12 tenderave të AKSHI-t, ku dyshohet për manipulim të procedurave, shkelje të barazisë në tendera dhe favorizim të kompanive të caktuara. Në kuadër të hetimeve janë marrë masa sigurie edhe ndaj Ergys Agasit, Ermal Beqirajt, Hava Delibashit, Erion Ismailit, Andis Papës, G.H. dhe Rogers Rrytës, ndërsa hetimet kanë përfshirë kontrolle në banesa dhe biznese në Tiranë e Durrës.
Akuzat e ngritura nga SPAK përfshijnë grup të strukturuar kriminal, shkelje të barazisë në tendera, korrupsion, shpërdorim detyre, pastrim parash dhe heqje të paligjshme të lirisë. Hetimi për procedurat tenderuese ka zgjatur rreth një vit dhe pritet të vijojë për të përcaktuar përgjegjësitë e personave të përfshirë.