Aktivitetet e kujdesit ndaj vetes nuk kanë nevojë të zgjasin shumë. Studime të ndryshme tregojnë se edhe praktika shumë të shkurtra, të cilat zgjasin nga disa sekonda deri në pak minuta, mund të ndihmojnë në përmirësimin e humorit, mirëqenies dhe nivelit të energjisë.Lexo edhe:Dhimbja në këmbë që mund të sinjalizojë një sëmundje serioze të enëve të gjakut Këto njihen si “mikropraktika” dhe mund të përfshihen lehtësisht në përditshmëri. Një prej tyre është joga e të qeshurit, e cila përfshin nisjen e një të qeshure të qëllimshme, edhe pa pasur një arsye. Edhe pse në fillim mund të duket e çuditshme, e qeshura e shtirur shpesh shndërrohet në të qeshur të vërtetë. Sipas një analize të gjerë të studimeve, e qeshura pa bazë humoristike mund të ndihmojë në uljen e ankthit dhe simptomave të depresionit. Një tjetër praktikë e thjeshtë është “mikro-joga”, veçanërisht e dobishme për njerëzit që kalojnë shumë kohë para kompjuterit. Shtrirjet e shkurtra, të kombinuara me frymëmarrje të thellë dhe përqendrim, mund të lehtësojnë tensionin në qafë dhe trup, si dhe të ndihmojnë në përmirësimin e qëndrimit. Frymëmarrja e ngadaltë dhe e thellë është një tjetër mënyrë e shpejtë për të qetësuar trupin dhe mendjen. Marrja e vetëm tre frymëmarrjeve të ngadalta, me nxjerrje më të gjatë të ajrit sesa marrja e tij, mund të ndihmojë në uljen e stresit dhe ankthit. Kjo praktikë mund të bëhet pothuajse kudo, edhe para një takimi të rëndësishëm apo në momente kur mendja është e mbingarkuar. Ndërkohë, prekja qetësuese ndaj vetes është një tjetër mikropraktikë që mund të zgjasë vetëm rreth 20 sekonda. Vendosja e duarve mbi gjoks ose bark, e shoqëruar me mendime të mira dhe dashamirëse ndaj vetes, është lidhur me ulje të nivelit të kortizolit, hormonit të stresit dhe me rritje të ndjenjës së vetëdhembshurisë. Ekspertët theksojnë se nuk është e nevojshme të praktikohen të gjitha këto metoda. Ideja është të gjendet ajo që përshtatet më mirë me rutinën dhe nevojat personale. Edhe një pushim i shkurtër gjatë ditës, disa frymëmarrje të thella gjatë ecjes apo pak shtrirje mund të shërbejnë si mënyra të thjeshta për të reduktuar stresin dhe për të përmirësuar mirëqenien.
