Burimi i Ujit të Zi pranë Këlcyrës është kthyer në objektin e një ekspedite të re nga një grup zhytësish polakë, të cilët po eksplorojnë shpellat nënujore për të zbuluar se çfarë fshihet në thellësitë e tyre. Pas ekspeditës së parë në vitin 2025, ekipi u rikthye këtë vit i përgatitur për disa ditë zhytjesh intensive, në temperatura mbi 35°C, duke dokumentuar shpellën metër pas metri. Një nga sfidat kryesore ishte ndryshimi i madh i thellësisë, e cila në disa pjesë varion nga disa metra deri në 90 metra.
Një nga arritjet më të rëndësishme ishte kalimi në një zonë ku më parë askush nuk kishte mundur të depërtonte. Rreth 1.3 kilometra nga hyrja, zhytësit u përballën me një çarje shumë të ngushtë, por arritën ta kalonin dhe të vazhdonin eksplorimin. Më tej, shpella zbriste deri në rreth 130 metra thellësi, duke e bërë të pamundur vazhdimin për shkak të kufizimeve të dekompresionit. Për më tepër, rreth 1.5 kilometra litarë të përdorur nga ekipi nuk mjaftuan për të pajisur të gjithë shpellën.
Zbulimi më interesant lidhet me ndryshimin e papritur të drejtimit të rrjedhës së ujit pikërisht në zonën ku fillojnë çarjet. Sipas eksploruesve, rrjedha drejtohet nga Petranikusi, duke ngritur pyetjen nëse dy sistemet shpellore mund të jenë të lidhura mes tyre. Deri tani, ekipi ka hartëzuar rreth 1.5 kilometra të shpellës së Ujit të Zi, deri në një thellësi prej 130 metrash, ndërsa eksploruesit paralajmërojnë se do të rikthehen për të vazhduar kërkimet.