Një specie e re maceje të egër është identifikuar në pyjet e Bolivisë, pasi për vite me radhë ishte ngatërruar me lloje të tjera për shkak të ngjashmërisë në pamje. E pagëzuar macja Tilcaya, me emrin shkencor Leopardus tilcayo, kafsha ka përmasa të përafërta me një mace shtëpiake. Zbulimi nisi pasi studiuesja boliviane Paola Nogales-Ascarrunz vuri re karakteristika të pazakonta te një mace 10-vjeçare që jetonte në një strehë shpëtimi dhe që ishte gjetur në pyll nga një banor vendas.
Për të konfirmuar identitetin e kafshës, shkencëtarët analizuan ADN-në e maceve të gjalla dhe të ekzemplarëve të ruajtur në muze. Rezultatet treguan se ajo i përket një linje gjenetike të veçantë, duke konfirmuar se bëhet fjalë për një specie më vete. Një prej ekzemplarëve të njohur mban nofkën “Tigrino”. Studimi, i publikuar në revistën Current Biology, sugjeron gjithashtu se grupi i maceve tigër mund të përbëhet nga pesë specie, në vend të tre që njiheshin më parë.
Zbulimi shihet si i rëndësishëm edhe për ruajtjen e biodiversitetit, pasi macet tigër në Amerikën Qendrore dhe Jugore përballen me shpyllëzimin, humbjen e habitatit dhe gjuetinë e paligjshme. Megjithatë, shkencëtarët ende nuk kanë të dhëna të plota për numrin e Leopardus tilcayo që jetojnë në natyrë apo për shtrirjen e saktë të habitatit të tyre në Bolivi. Studiuesit theksojnë se rasti tregon se edhe gjitarë të vegjël, të ngjashëm me specie të njohura, mund të mbeten të pazbuluar në zona të botës që janë ende pak të studiuara.