Vera e vitit 2026 po vijon të thyejë rekorde meteorologjike në Francë, pasi vala e të nxehtit që ka përfshirë vendin ka arritur në 22 ditë dhe është tashmë e dyta më e gjata e regjistruar që nga fillimi i matjeve në vitin 1947. Sipas Météo France, Indeksi Kombëtar i Nxehtësisë (ITN), i cili llogaritet bazuar në mesataren e temperaturave në 30 stacione meteorologjike përfaqësuese në të gjithë vendin, arriti në 24.5 gradë Celsius të martën, më 18 gusht.
“Jemi në valën e 22-të të të nxehtit, përkohësisht në vendin e dytë që nga viti 1947”, deklaroi shërbimi meteorologjik francez.
Kohëzgjatja e valës aktuale ka tejkaluar atë të korrikut 2006, e cila zgjati 21 ditë. Rekordi absolut mbetet ai i korrikut 1983, kur Franca u përball me një valë të nxehti që zgjati 23 ditë.
Në të njëjtën kohë, sipas një analize të të dhënave meteorologjike, në Francë janë regjistruar në total më shumë se 50 ditë me valë të nxehti gjatë vitit 2026, një tjetër rekord.
Episodi aktual është vala e 54-të e të nxehtit e regjistruar në Francë që nga viti 1947.
Një tjetër element i rëndësishëm është se më shumë se gjysma e këtyre episodeve kanë ndodhur që nga viti 2010, në një periudhë të karakterizuar nga rritja e vazhdueshme e temperaturave për shkak të ndryshimeve klimatike të shkaktuara nga aktivitetet njerëzore.
Vera e vitit 2026 dallohet veçanërisht për frekuencën e jashtëzakonshme të episodeve me temperatura të larta. Në më pak se dy muaj, Franca ka përjetuar tashmë tre valë të ndryshme të të nxehtit.
Në fund të majit, vendi u përfshi nga një tjetër episod me temperatura jashtëzakonisht të larta, i cili u cilësua si historikisht i hershëm për këtë periudhë të vitit. Top Channel