Gati dy vite pas vdekjes së Liam Payne, dokumente të reja hedhin më shumë dritë mbi orët e fundit të ish-anëtarit të One Direction, i cili humbi jetën më 16 tetor 2024, pasi ra nga kati i tretë i hotelit CasaSur Palermo në Buenos Aires. Mbi 3,000 faqe dokumentesh, dëshmi, mesazhe dhe pamje nga kamerat e sigurisë kanë ndihmuar në rindërtimin e ngjarjeve të asaj dite. Materialet përshkruajnë një situatë që u përkeqësua gradualisht, me përdorim alkooli dhe droge dhe me sjelljen e këngëtarit që, sipas dëshmive, u bë gjithnjë e më e pakontrollueshme.
Mes provave të reja janë edhe mesazhet që Payne i kishte dërguar njërës prej dy shoqërueseve që e vizituan disa orë para vdekjes.
Sipas dokumenteve, këngëtari kërkonte pesë gramë kokainë dhe u kishte ofruar dy grave 5 mijë dollarë për të kaluar kohën me të.
Shoqërueset kanë deklaruar para hetuesve se kur mbërritën në hotel, Payne ishte tashmë në gjendje të rënduar nga alkooli.
Edhe punonjësit e hotelit CasaSur kishin vënë re sjelljen problematike të këngëtarit. Menaxherja Gilda Martin e kishte përshkruar Payne si një klient “shumë të ndërlikuar” dhe kishte kërkuar që stafi të tregonte kujdes gjatë komunikimit me të.
Në një rast, kur duhej t’i dërgoheshin pesë shishe uiski në dhomë, një punonjëse ishte këshilluar të shoqërohej nga një roje sigurie.
Martin dhe menaxheri i pritjes Esteban Grassi u akuzuan fillimisht për vrasje të paqëllimshme, por akuzat ndaj tyre u hoqën në shkurt 2025.
Dokumentet përmbajnë edhe dëshminë e mikut të Payne, Roger Nores, me të cilin këngëtari kishte komunikuar në orët e fundit.
Nores u tha hetuesve se Payne kishte probleme të njohura me alkoolin dhe drogën, ndërsa foli edhe për atë që e përshkroi si një varësi të tij nga mesazhet seksuale.
Sipas dëshmisë së tij, Payne i kishte shprehur shqetësimin se mund t’i kishte dërguar pa vetëdije një fotografi intime një vajze të mitur. Nores theksoi se nuk kishte qenë dëshmitar i drejtpërdrejtë i një sjelljeje të tillë.
Tensionet u rritën edhe në momentin kur erdhi koha për pagesën e shoqërueseve. Sipas dëshmive, Payne nuk kishte mjaftueshëm para dhe u ofroi atyre një Rolex.
Kur ato nuk e pranuan, ai dyshohet se e përplasi orën në mur. Pamjet dhe dëshmitë përshkruajnë një dhomë të rrëmujshme dhe një situatë që po dilte gjithnjë e më shumë jashtë kontrollit.
Një pjesë e rëndësishme e dokumenteve të reja janë pamjet e kamerave të sigurisë.
Rreth orës 03:20 të mëngjesit, Payne është filmuar jashtë hotelit, duke u mbajtur me krahë pas një shtylle dhe me trupin pothuajse paralel me tokën.
Disa orë më vonë, ai shfaqet në hollin e hotelit në një gjendje të rënduar. Pak para orës 17:00, stafi e shoqëroi sërish drejt dhomës së tij në katin e tretë.
Në orën 17:07, u dëgjua zhurma e rënies së tij nga ballkoni.
Pamjet e Payne-it duke u mbajtur pas shtyllës kanë nxitur edhe një hipotezë mbi sekondat para rënies.
Sipas rindërtimit të mundshëm, ai mund të ketë tentuar të ngjitej ose të ulej nga ballkoni, duke mbivlerësuar aftësinë e tij për të mbajtur peshën e trupit.
Megjithatë, rrethanat e sakta të momentit të rënies nuk janë përcaktuar përfundimisht. Hetimet argjentinase nuk gjetën prova se dikush tjetër kishte ndërhyrë fizikisht dhe as prova që të mbështesnin hipotezën e vetëvrasjes.
Babai i këngëtarit, Geoff Payne, ka përjashtuar mundësinë që i biri të kishte dashur t’i jepte fund jetës.
Ai ka deklaruar se ishte i bindur se Liam donte të jetonte dhe se, kur ishte nën ndikimin e substancave, “nuk kishte kontroll mbi atë që po bënte”.
Testet toksikologjike pas vdekjes zbuluan alkool, kokainë dhe një ilaç me recetë. Shkaku i vdekjes u përcaktua si trauma të rënda dhe hemorragji të shkaktuara nga rënia.
Në aspektin gjyqësor, Roger Nores është liruar përfundimisht nga akuzat.
Ndërkohë, Braian Nahuel Paiz dhe Ezequiel David Pereyra, të akuzuar për furnizimin e Payne me kokainë, vijojnë të jenë pjesë e procesit gjyqësor.
Dokumentet e reja nuk ndryshojnë shkakun e vdekjes së Liam Payne, por japin një pamje më të detajuar të orëve të fundit të këngëtarit dhe të përkeqësimit të shpejtë të situatës para tragjedisë. Top Channel