Vallja e Osman Takës është përfshirë në Listën Kombëtare të Trashëgimisë Kulturore Jomateriale të Shqipërisë. Lajmi është bërë i ditur nga ministri i Turizmit, Kulturës dhe Sportit, Blendi Gonxhja, ndërsa kryeministri Edi Rama ka reaguar duke e cilësuar këtë valle si një prej shprehjeve të identitetit dhe traditës çame. “Vallja e Osman Takës përfshihet në Listën Kombëtare të Trashëgimisë Kulturore Jomateriale të Shqipërisë”, shkroi Rama. Sipas kryeministrit, vallja përcjell në kohë historinë, krenarinë dhe qëndresën e një tradite të trashëguar ndër breza. “Simbol i identitetit çam, kjo valle mbart historinë, krenarinë dhe qëndresën e një tradite të përcjellë ndër breza”, u shpreh Rama. Vallja lidhet me figurën e Osman Takës, nga Konispoli, dhe karakterizohet nga lëvizje të fuqishme, por njëkohësisht elegante. Përmes interpretimit të saj, ajo përcjell vlera si trimëria, sakrifica, solidariteti dhe shpirti i lirë. Përfshirja në Listën Kombëtare të Trashëgimisë Kulturore Jomateriale synon të njohë dhe të ruajë këtë traditë, duke e përcjellë atë te brezat e ardhshëm.
