Katër aeroportet kryesore të Moskës janë përfshirë nga kaosi për shkak të kërcënimeve me dronë ukrainas dhe shfaqjes së balonave zbuluese, duke shkaktuar anulimin ose vonesën e të paktën 350 fluturimeve. Mes avionëve të prekur nga situata raportohet edhe flota që shoqëronte presidentin rus, Vladimir Putin, pas kthimit të tij nga Turkmenistani. Sipas raportimeve të mediave të huaja, autoritetet ruse vendosën kufizime të përkohshme në aeroportet Vnukovo, Sheremetyevo, Domodedovo dhe Zhukovsky, për shkak të aktivitetit intensiv të dronëve në hapësirën ajrore pranë kryeqytetit. Kryebashkiaku i Moskës, Sergei Sobyanin, deklaroi se sistemet e mbrojtjes ajrore kishin rrëzuar 15 dronë që po i afroheshin qytetit. Ndërkohë, banorë në disa zona jugore të kryeqytetit raportuan shpërthime dhe aktivitet të mbrojtjes ajrore. Flota e Putinit devijohet drejt Shën Petersburgut Situata duket se ka prekur edhe udhëtimin e presidentit rus. Sipas gazetës britanike “The Sun”, mbyllja e hapësirës ajrore pas kthimit të Putinit nga Turkmenistani detyroi avionët që e shoqëronin atë dhe zyrtarë të tjerë të kërkonin alternativa për destinacionin e tyre. Të dhënat e gjurmimit të fluturimeve treguan se avioni i Putinit dhe avionët shoqërues po fluturonin mbi Moskë. Dy prej tyre raportohet se u devijuan drejt Shën Petersburgut.
Megjithatë, nuk është bërë e qartë se në cilin avion udhëtonte presidenti rus në momentin e ndryshimit të itinerarit.
Vnukovo, aeroporti më i prekur
Sipas të dhënave të shërbimit të gjurmimit të fluturimeve Flightradar24, aeroporti Vnukovo u prek më rëndë nga kufizimet. Mbi 40% e fluturimeve u vonuan, me një vonesë mesatare prej 102 minutash, ndërsa rreth 10% u anuluan.
Kufizimet hynë në fuqi rreth orës 15:40 sipas kohës lokale. Ato erdhën pas një serie ndërprerjesh gjatë natës në Vnukovo, Domodedovo dhe Zhukovsky, të cilat u hoqën rreth orës 07:00 të mëngjesit. Megjithatë, Zhukovsky pezulloi më pas operacionet edhe dy herë të tjera.
Më shumë se 150 fluturime ishin vonuar edhe gjatë natës, ndërsa bilanci i përgjithshëm i raportuar për ditën arriti në të paktën 350 fluturime të anuluara ose të vonuara.
Ndërkohë, autoritetet në rajonin e Jaroslavlit, në verilindje të Moskës, njoftuan se po vijonin përpjekjet për të neutralizuar balonat e vogla zbuluese të nisura nga Ukraina.
Zhvillimet vijnë në një kohë kur Rusia përballet me sulme të përsëritura me dronë ukrainas, ndërsa kufizimet në aeroportet e kryeqytetit tregojnë ndikimin e këtyre kërcënimeve edhe në trafikun ajror civil. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb