Tirana / Nga Ballkani e Gjiri Arabik, deri në Indi, manjati shfrytëzon pozitën e tij për të ngritur rrokaqiej dhe resorte. Ndërsa administrata amerikane formëson politikën e jashtme, perandoria e Trump zgjerohet në të njëjtat vende... Në varrezat e vogla të Châu Ninh, mes pemëve të frutave në deltën e Lumit të Kuq, në Vietnam, mbi 4.000 familje fshatarësh janë detyruar të zhvarrosin eshtrat e të parëve të tyre, para se buldozerët të rrafshojnë arat, shtëpitë dhe varret.
Në vend të tyre, mbi 900 hektarë tokë të shpronësuar për pak dollarë, do të ngrihen 3 fusha golfi, vila dhe hotele luksoze në emër të Donald Trump. Projekti i resortit, me vlerë 1.5 miliardë dollarë, është copëza e fundit e “diplomacisë së tullave” të Donald Trump.
Ndërsa qeveritë negociojnë me Shtëpinë e Bardhë, perandoria imobiliare e familjes së presidentit shtrihet në territoret e tyre. Nga arat e orizit të Vietnamit te plazhet e Shqipërisë, nga kulla në Tbilisi te resoret e monarkive të Gjirit Arabik, zgjerimi imobiliar i familjes Trump ndjek me një saktësi të habitshme hartën e politikës së jashtme amerikane.
Deri tani nuk ka asnjë provë për një shkëmbim të drejtpërdrejtë mes vendimeve të Shtëpisë së Bardhë dhe lejeve imobiliare. Por lidhja është e qartë: qeveritë dhe sipërmarrësit vendas sigurojnë tokën, lejet dhe kapitalin, ndërsa familja presidenciale vë vulën “Trump” dhe arkëton të ardhura nga licencat.
Si funksionon skema
Modeli duket shumë qartë në Vietnam. “Trump Organization” nuk financon projektin e as nuk merret me kompensimet. Partneri vietnamez ka paguar 5 milionë dollarë për të përdorur markën dhe do të administrojë vetë klubin e golfit.
Ajo që ngjall dyshime është koha. Hanoi i dha miratimin përfundimtar më 16 maj 2025, pikërisht kur po negocionte me Uashingtonin për të shmangur tarifat e kërcënuara nga Trump, tri ditë para raundit të dytë të bisedimeve tregtare.
Ceremonia e nisjes së punimeve, me Eric Trump dhe kryeministrin vietnamez Phạm Minh Chính, u zhvillua në mes të atyre bisedimeve. I njëjti mekanizëm përsëritet edhe në dymbëdhjetë raste të tjera. “Trump Organization” investon rrallë paratë e veta.
Ajo jep të drejtën e përdorimit të markës, ndonjëherë menaxhon hotelin ose fushën e golfit dhe merr një komision së bashku me të drejta autorësh. Në Dubai, markës i është dhënë licencë kompanisë saudite Dar Global, e cila do të ndërtojë një Trump Tower, e njoftuar dy javë para se Trump të pritej në Emiratet nga presidenti Mohammed bin Zayed.
E njëjta kompanii po zhvillon në Oman një kompleks prej 4 miliardë dollarësh, me hotel, vila dhe fushë golfi. Donald Trump ua ka besuar drejtimin e perandorisë djemve të tij, por nuk i ka shitur aksionet e veta. Pasuritë mbeten në një fondacion, përfitues i të cilit është ai, dhe të ardhurat nga presidenca vazhdojnë t’i takojnë atij.
Gjatë vitit 2025, projektet imobiliare jashtë vendit kanë sjellë rreth 59 milionë dollarë vetëm nga licencat, gati dy herë më shumë se një vit më parë.
Në vendet e Gjirit Arabik
Në këto vende, kufiri midis sektorit privat dhe pushtetit publik shpesh nuk dallohet fare. Në Katar, “Trump International Golf Club” dhe disa vila bëjnë pjesë në zhvillimin e Simaisma, të realizuar edhe nga “Qatari Diar”, një kompani shtetërore.
Marrëveshja u nënshkrua dy javë para se Trump të mbërrinte në Doha dhe të takohej me emirin Tamim bin Hamad Al-Thani, pak para udhëtimit presidencial në Arabinë Saudite, Katar dhe Emiratet, gjatë të cilit ai negocioi investime, furnizime ushtarake dhe energji.
Doha është shtëpia e një prej bazave kryesore amerikane në Lindjen e Mesme dhe ndërmjetëse në bisedimet me Iranin dhe për Gazën. Marka e presidentit hyn në një projekt
të kontrolluar nga një shtet, siguria e të cilit varet nga Shtëpia e Bardhë.
Në Arabinë Saudite, marrëdhënia është edhe më e thellë. “Dar Global” dhe “Trump Organization” kanë njoftuar zhvillime të reja me vlerë dhjetë miliardë dollarë në Riad dhe Xhedë, më pak se dy muaj pas vizitës së princit të kurorës, Mohammed bin Salman, në Shtëpinë e Bardhë.
Në Dirijia do të ngrihen “Trump National Golf Course” dhe një “Trump International Hotel”; në Xhedah, “Trump Plaza” dhe një “Trump Tower”. Bizneset ecin krah për krah me forcimin e aleancës mes Trump dhe princit trashëgimtar, nga samiti i Riadit te nënshkrimi në Uashington i marrëveshjes strategjike të mbrojtjes, e deri te bashkëpunimi ushtarak dhe menaxhimi i krizës iraniane.
“Dar Global” është motori kryesor i zgjerimit: Dubai, Oman, Katar, Arabia Saudite dhe tani edhe Maldive, ku po projekton një “Trump International Hotel” me vila buzë bregut të detit. Ai synon të mbledhë deri në 70 për qind të kapitalit përmes tokenëve dixhitalë, të cilët do t'u ofrohen edhe investitorëve të vegjël amerikanë. Projekti u njoftua një ditë para takimit në Shtëpinë e Bardhë mes Trump dhe Mohammed bin Salman.
Në Ballkan
Përtej “Trump Organization”, vepron një perandori e dytë, ajo e dhëndrit të Trump, Jared Kushner. Në Shqipëri, Affinity Partners i tij po promovon resorte në ishullin e Sazanit, ish-bazë ushtarake, dhe në bregdetin e Zvërnecit, pranë lagunës së mbrojtur të Vjosë-Nartës. Qeveria e Edi Ramës i ka dhënë projektit statusin “investim strategjik”. Mijëra njerëz kanë nisur ”Revolucionin e Flamingove”, duke denoncuar rrezikun për ligatinat dhe kafshët e mbrojtura.
Për qeverinë shqiptare, projekti është shenjë e një aksesi të privilegjuar te Shtetet e Bashkuara. Për opozitën, kjo është dëshmi e një shteti të gatshëm t’i bëjë qejfin një investitori të lidhur me Shtëpinë e Bardhë.
E njëjta skemë ishte shfaqur edhe në Serbi, ku Affinity kishte marrë një kontratë 99-vjeçare për të shndërruar ish-selinë e ushtrisë jugosllave, të bombarduar nga NATO në vitin 1999,
në hotel, apartamente dhe zyra, përfshirë edhe një hotel me markën Trump.
Megjithatë, pas muajsh protestash dhe një hetimi për dokumente të falsifikuara për të hequr mbrojtjen e këtij vendi, të mbrojtur si trashëgimi kulturore, Kushner e ka braktisur projektin.
Në Kaukaz
Në Gjeorgji, projekti është drejtpërdrejt nga “Trump Organization”. Me 70 katet e tij, “Trump Tower Tbilisi” pritet të bëhet ndërtesa më e lartë e kryeqytetit, në një sipërfaqe që i përkiste fondit Cartu, të lidhur me Bidzina Ivanishvili, i cili është ende nën sanksionet amerikane për rolin e tij në largimin e Gjeorgjisë nga Perëndimi dhe afrimin me Moskën.
Për elitën drejtuese gjeorgjiane, kulla vlen si një “certifikatë” amerikane, ndërkohë që marrëdhëniet me Uashingtonin mbeten të tendosura. Mekanizmi është përsëritur edhe në Indonezi, me një resort pranë Xhakartës që ka marrë statusin e zonës ekonomike speciale. Fushat e golfit, hoteli dhe rezidencat menaxhohen nga “Trump Organization”, megjithëse ministria e Mjedisit ka ndaluar punimet për shkak të problemeve me ujin. India është tashmë tregu më i madh i huaj për markën Trump, me nëntë projekte në Bombei, Pune, Gurugram dhe Kalkuta, të cilave i është shtuar edhe “Trump World Center” kompleksi i parë tregtar i grupit në vend, pikërisht në kohën kur Uashingtoni po negocion me Modin për taksa, tregti dhe energji.
Në Rumani, është njoftuar ndërtimi i një “Trump Tower” në Bukuresht dhe i një fushe golfi në Transilvani, pas përplasjes mes Uashingtonit dhe Bashkimit Evropian për anulimin e zgjedhjeve presidenciale rumune.
Në Izrael, “Trump Organization” ka zhvilluar së fundi bisedime paraprake për të menaxhuar dhe për t’i dhënë emrin Hotelit Sarona në Tel Aviv, një ndërtesë 47-katëshe me rreth tetëqind dhoma, ndërsa në Shtëpinë e Bardhë po shpeshtohen takimet mes Trump dhe Netanyahut, drejtues i njërit nga vendet më të varura nga vendimet e tij ushtarake dhe diplomatike.
Të marra veç e veç, këto projekte mund të duken si marrëveshje të zakonshme tregtare të nënshkruara nga bijtë e një sipërmarrësi që u bë president. Por të vështruara në tërësi, ato vizatojnë një rrjet imobiliar që zgjerohet pikërisht në vendet që i nënshtrohen vendimeve amerikane për taksat, armët, sanksionet dhe mbrojtjen ushtarake.
Partnerët vendas ofrojnë tokën, kapitalin dhe lejet; familja Trump vë markën, ua kalon rreziqet të tjerëve dhe e shndërron afërsinë me Shtëpinë e Bardhë në të ardhura nga licencat./Pamfleti nga “La Stampa”trump gjeopolitika e tullave Lini një Përgjigje Anuloje përgjigjen Forum Divjaka përballë reformës administrativo-territoriale të propozuar nga PS 31 Korrik 2026, 11:0411:04Forum Europianisti i kafenesë, Fejton 30 Korrik 2026, 21:4021:40Forum Nga mender shefat e PD-së te zdrapat e PS-së! 30 Korrik 2026, 20:1620:16Forum Drafti, thikë pas shpine ndaj qytetarit e territorit! 30 Korrik 2026, 18:2118:21Forum Revolta që ka futur në krizë politikën e brendshme dhe të jashtme të Shqipërisë 30 Korrik 2026, 12:1612:16Forum Kur bëhet fjalë për atdheun, të tjerat janë hiç 30 Korrik 2026, 11:5811:58Forum