Këpucët rozë u kthyen në një nga detajet më të dukshme të Kupës së Botës 2026, pasi një numër i madh futbollistësh zgjodhën të luanin me këtë ngjyrë në fushë. Fenomeni tërhoqi vëmendjen e tifozëve dhe mediave, ndërsa drejtuesit e Adidas pranuan se përputhja e pazakontë mes markave ishte një situatë që nuk ishte parashikuar.
Drejtori ekzekutiv i Adidas, Bjørn Gulden, tha se dominimi i ngjyrës rozë ishte thjesht një rastësi dhe jo rezultat i ndonjë koordinimi mes prodhuesve të pajisjeve sportive.
“Roza është një ngjyrë e bukur, pa diskutim. Por fakti që të gjithë përfunduam me të njëjtën ngjyrë është i çuditshëm”, deklaroi Gulden, duke shtuar se kompania shpreson që një situatë e tillë të mos përsëritet.
Sipas tij, Adidas nuk kishte informacion paraprak mbi ngjyrat që do të përdornin rivalët si Nike, Puma apo marka të tjera. Për shkak të mënyrës së pavarur të zhvillimit të koleksioneve të reja, disa kompani përfunduan duke zgjedhur të njëjtën nuancë.
Ekspertët e marketingut sportiv shpjegojnë se ngjyra rozë mund të jetë bërë kaq e popullarizuar sepse dallohet shumë në fushën e gjelbër dhe bie më lehtë në sy gjatë transmetimeve televizive. Për shumë futbollistë, ajo lidhet gjithashtu me stilin personal dhe vetëbesimin.
Megjithëse këpucët rozë u kthyen në një simbol të Kupës së Botës 2026, Adidas pranoi se për një markë sportive është e rëndësishme që produktet e saj të dallohen dhe të mos humbasin identitetin mes konkurrentëve.