Terapia hormonale mund të lidhet me një rrezik më të ulët të demencës te gratë, sugjeron një studim i ri. Studiuesit gjetën se përdorimi i terapisë vetëm me estrogjen në moshë të madhe shoqërohej me më pak shenja të sëmundjes së alzheimerit dhe më pak raste demence. Megjithatë, studimi nuk provon se terapia hormonale e parandalon demencën. Studiuesit amerikanë analizuan të dhënat mjekësore të 21.462 grave, të ndara në dy grupe. Njëri grup përfshinte 728 gra që iu nënshtruan skanimeve të trurit ose testeve të biomarkerëve gjatë jetës, ndërsa 2959 gra nga grupi tjetër iu nënshtruan autopsisë pas vdekjes, në moshën mesatare 82 vjeç, për të kërkuar shenja të alzheimerit.Lexo edhe:Ndryshimi i kujtimeve të dhimbshme të fëmijërisë mund të ulë frikën nga dështimi Pjesëmarrëset u ndoqën për rreth tre deri në pesë vjet, duke nisur nga mosha mesatare 71 vjeç. Gjithsej 1953 gra kishin përdorur terapi hormonale, ndërsa 19.509 nuk e kishin përdorur. Ato që e kishin përdorur kishin nisur terapinë mesatarisht pas moshës 70 vjeç. Studiuesit analizuan vetëm terapinë me estrogjen, pasi studime të mëparshme kishin sugjeruar se kombinimi i estrogjenit me progestinën mund të rrisë rrezikun e demencës. Sot, terapia vetëm me estrogjen u jepet zakonisht grave që kanë kryer histerektomi, për shkak të rrezikut të kancerit të endometrit. Te gratë për të cilat kishte të dhëna nga autopsia, ato që kishin përdorur terapi hormonale kishin më pak shenja të alzheimeritnë tru. 18% e përdorueseve nuk kishin asnjë shenjë të sëmundjes, krahasuar me 10% të grave që nuk kishin përdorur terapi. Ndërsa të tria shenjat kryesore të alzheimerit u gjetën te 40% e përdorueseve, kundrejt 51% të grupit tjetër. Pas përshtatjes për moshën, arsimin, faktorët gjenetikë, racën dhe tensionin e lartë të gjakut, përdorueset e terapisë hormonale kishin 35% më pak gjasa të shfaqnin shenja të alzheimerit në autopsi. Një analizë tjetër tregoi gjithashtu më pak grumbullim të proteinës amiloid në tru te gratë që kishin përdorur terapi hormonale. Përdorimi i saj lidhej edhe me 39% më pak gjasa për diagnozë klinike të demencës, si dhe me rrezik më të ulët për probleme me kujtesën dhe aftësitë funksionale. Studimi, i publikuar në revistën Neurology, nuk provon se terapia hormonale parandalon demencën. Autorët theksojnë se gratë e studiuara e kishin përdorur terapinë dekada më parë, në mosha dhe mënyra që ndryshojnë nga praktika e sotme, ndaj rezultatet nuk mund të zbatohen drejtpërdrejt te gratë që përdorin terapi hormonale sot.
