Një fotografi e mbërritur në redaksinë e JOQ ngre një tjetër shqetësim serioz për mënyrën se si po shfaqet dhe po normalizohet agresiviteti mes adoleshentëve, këtë herë përmes imazhit të dy vajzave të m*tura.
Sipas denoncuesit, fotografia është publikuar një ditë më parë në Instagram. Në të shfaqen dy vajza adoleshente, të veshura me të zeza, me kapuç dhe fytyrat e mbuluara. Njëra duket se mban në dorë një thikë, ndërsa tjetra një objekt të ngjashëm me një dorezë hekuri.
Pamja është e tillë që duket e menduar për të krijuar një imazh intimidues, duke imituar një lloj “look-u” të botës së krimit apo të personazheve që shfaqen si të rrezikshëm.
Por shqetësimi nuk qëndron vetëm te kjo fotografi.
Nuk është rasti i parë që dhuna dhe agresiviteti shfaqen si pjesë e identitetit të adoleshentëve.
Në redaksinë tonë kanë mbërritur edhe më herët denoncime dhe pamje të episodeve të dhunës mes të m*turve, përleshje, konflikte, kërcënime dhe raste ku adoleshentë janë filmuar duke u përballur me njëri-tjetrin, ndërsa videot më pas qarkullojnë në rrjetet sociale.
Ajo që po ndryshon dhe që duhet të na bëjë të ndalemi është mënyra se si dhuna nuk shfaqet më vetëm si pasojë e një konflikti, por në disa raste duket se po kthehet edhe në një mënyrë për të ndërtuar imazh dhe për të fituar vëmendje.
Nga një pozë për “like” te normalizimi i dhunës
Në një moshë kur adoleshentët kërkojnë të formojnë identitetin e tyre dhe të fitojnë pranim nga bashkëmoshatarët, rrjetet sociale kanë një ndikim të madh.
Një fotografi, një video apo një postim mund të marrë brenda pak minutash vëmendjen e një grupi të tërë. Dhe kur agresiviteti, kërcënimi apo imazhi i “të fortit” marrin reagime, pëlqime dhe komente, ekziston rreziku që sjellja të përsëritet dhe të normalizohet.
Në këtë rast, pyetja është e thjeshtë:
Çfarë i shtyn dy vajza adoleshente të mendojnë se një fotografi me thikë dhe dorezë hekuri është një imazh që ia vlen të publikohet?
Nuk mund ta dimë përgjigjen vetëm nga një fotografi. Por fenomeni meriton të trajtohet seriozisht, sidomos kur raste të tjera të agresivitetit mes të m*turve janë shfaqur vazhdimisht.
Vajzat nuk janë më jashtë këtij fenomeni
Dhuna mes të rinjve nuk është problem i një gjinie të caktuar dhe nuk duhet të konsiderohet “normale” te djemtë e pazakontë te vajzat.
Por pamje të tilla tregojnë se edhe vajzat adoleshente po shfaqen gjithnjë e më shumë në situata ku agresiviteti, kërcënimi dhe simbolika e dhunës përdoren për të krijuar një imazh të caktuar.
Dhe kjo duhet të na shqetësojë pikërisht sepse flasim për fëmijë që po rriten në një realitet ku dhuna mund të kthehet në përmbajtje për rrjetet sociale.
Sot mund të jetë një fotografi.
Nesër mund të jetë një konflikt.
Dhe kur konfliktet e moshës shoqërohen me mjete të rrezikshme, pasojat mund të jenë shumë më të rënda.
“Nuk dimë as si t’i informojmë familjet”
Denoncuesi thotë se situata po kthehet në shqetësim edhe për banorët e zonës dhe se nuk dinë se si të komunikojnë me familjet e fëmijëve.
“Këto adoleshente dhe shumë si këto janë bërë shqetësuese për shoqërinë dhe moshën e m*tur, duke postuar dhe mbështetur sjellje agresive e dhunë. Duke u shfaqur me doreza hekuri dhe thika nëpër duar”, shkruan qytetari.
Më tej, ai shprehet se përpjekjet për t’u folur në lagje nuk kanë dhënë rezultat.
“Po bëhet shumë shqetësuese. Nuk i dridhet qerpiku për asgjë edhe kur u flasim ne në lagje”, vijon denoncimi.
Janë pikërisht këto sinjale që nuk duhet të injorohen.
Sepse kur një adoleshent fillon ta shohë kërcënimin apo dhunën si mënyrë për të fituar respekt, vëmendje apo frikë nga të tjerët, problemi nuk zgjidhet thjesht duke hequr një postim nga Instagrami.
Ku janë familja, shkolla dhe shoqëria?
Pyetja nuk duhet të jetë vetëm: “Pse këto vajza pozojnë me thikë?”
Pyetja duhet të jetë shumë më e madhe:
Çfarë po ndodh me adoleshentët tanë?
A e dinë prindërit se çfarë publikojnë fëmijët e tyre në rrjetet sociale?
A po i vërejnë shkollat shenjat e para të agresivitetit?
A po flasim mjaftueshëm me fëmijët për pasojat e dhunës dhe jo vetëm pasi ndodh një incident?
Dhe a po e kuptojmë se një pjesë e përmbajtjeve që adoleshentët shohin çdo ditë mund të ndikojnë në mënyrën se si ata e perceptojnë forcën, respektin dhe statusin?
Nuk mjafton të reagojmë kur një konflikt përfn në dhunë. Duhet të dallojmë shenjat shumë më herët.
Kjo fotografi nuk është thjesht një fotografi
Nuk është e nevojshme të dimë identitetin e vajzave për të kuptuar se fotografia ngre një problem më të madh.
Ato janë të m*tura dhe duhen trajtuar me përgjegjësinë që kërkon mosha e tyre. Por pikërisht për këtë arsye, ajo që shohim duhet të na bëjë të mendojmë edhe më shumë.
Kur një adoleshent e sheh dhunën si diçka që mund të shfaqet me krenari në rrjetet sociale, shoqëria duhet të shqetësohet.
Jo për të stigmatizuar vajzat.
Jo për t'i etiketuar.
Por për të kuptuar pse po ndodh.
Sepse pas një fotografie të tillë mund të ketë shumë pyetje që nuk duken në ekran: presion nga shoqëria, konflikte, nevojë për vëmendje, modele të gabuara apo thjesht një përpjekje për t'u dukur “të forta”.
Dhe këtu duhet të ndërhyjnë të rriturit, familja, shkolla dhe institucionet.
Sot është një pozë në rrjetet sociale. Por pyetja që duhet t'i bëjmë vetes është: çfarë ndodh nëse nesër nuk mbetet vetëm një pozë?
Çfarë po ndodh me adoleshentët tanë dhe sa kohë do të vazhdojmë ta quajmë thjesht “fazë” atë që gjithnjë e më shumë po shfaqet si një shqetësim shoqëror?