Një qytetare nga Tirana i është drejtuar redaksisë së JOQ Albania për të denoncuar një ngjarje të pretenduar në zonën e Alliasit mbrëmjen e 26 gushtit, ku sipas saj një person i identifikuar si Denis Kuka është futur në një lokal dhe ka tentuar të godasë një klient.
Në pamjet e dërguara në redaksi, personi i identifikuar nga denoncuesja si Kuka shihet duke hyrë në ambientet e lokalit, ndërsa mban në dorë një dërrasë. Sipas saj, pronarja e lokalit ka ndërhyrë për ta ndaluar që të godiste klientin dhe ai është larguar nga vendi.
Denoncuesja pretendon se rreth 20 minuta më vonë, pas njoftimit të Policisë, i njëjti person është shfaqur sërish pranë lokalit, këtë herë me një automjet tip “Audi”.
Ajo pretendon se personi ka nxjerrë një armë zjarri dhe ka qëlluar në ajër, ndërsa pranë lokalit ndodheshin edhe fëmijë. Në videon e dytë të dërguar në redaksi duket automjeti, ndërsa dëgjohet edhe një zhurmë që denoncuesja e identifikon si krismë arme. Nga pamjet e vetme nuk mund të konfirmohet në mënyrë të pavarur se kush e ka kryer të shtënën.
Denoncuesja kërkon që institucionet të hetojnë ngjarjen dhe të verifikojnë të gjitha rrethanat.
Emri i Denis Kukës është raportuar edhe më herët në ngjarje të lidhura me armët. Në vitin 2022, ai u plagos me armë zjarri në Tufinë gjatë një konflikti. Në vitin 2023, Kuka u arrestua si pasagjer në një automjet ku Policia gjeti një armë zjarri dhe municion.
Ndërsa në tetor 2025, Policia e Matit njoftoi arrestimin e tij pasi, sipas saj, gjatë kontrollit të automjetit ku ai ndodhej u gjet një armë zjarri gjysmëautomatike.
JOQ Albania sjell denoncimin e qytetares dhe pamjet e vëna në dispozicion prej saj, ndërsa mbetet për t’u verifikuar nga autoritetet nëse pretendimet për të shtënën dhe pjesa tjetër e ngjarjes qëndrojnë. View this post on Instagram A post shared by JOQ Albania (@joqalbania)