Për vite me radhë është besuar se rritja e fëmijëve në një shtëpi me kafshë shtëpiake, veçanërisht me mace, mund të ketë efekte pozitive tek shëndeti dhe zhvillimi i tyre. Megjithatë, një studim i ri ka vënë në pikëpyetje disa prej këtyre bindjeve. Hulumtimi, i kryer në kuadër të projektit spanjoll “Infancia y Medio Ambiente” dhe i publikuar në World Journal of Pediatrics, ka ndjekur për tetë vjet rreth 1,900 çifte nënë-fëmijë në shtatë rajone të Spanjës.Lexo edhe:Pijet që ju ndihmojnë të flini më mirë: Ja cilat funksionojnë vërtet sipas ekspertëve Studiuesit analizuan të dhënat shëndetësore dhe pyetësorët e prindërve, duke u fokusuar tek gjendja emocionale e fëmijëve, problemet e sjelljes, hiperaktiviteti dhe marrëdhëniet e tyre me të tjerët. Rezultati më interesant lidhet me macet. Sipas studimit, prania e tyre në shtëpi u shoqërua me një rritje të problemeve të sjelljes tek fëmijët e moshës 4-5 vjeç. Në të njëjtën periudhë, kafshët e tjera jo tradicionale, si hamsterët dhe peshqit e kuq, u lidhën me efekte më pozitive, ndërsa qentë rezultuan kryesisht neutralë. Studiuesit theksojnë se kjo nuk do të thotë se macet shkaktojnë depresion apo probleme psikologjike tek fëmijët. Studimi tregon vetëm një lidhje dhe rezultatet mund të ndikohen edhe nga faktorë të tjerë. Një shpjegim i mundshëm lidhet me mënyrën e ndërveprimit. Macet mund të jenë më të pavarura dhe ndonjëherë shmangëse, duke e bërë më të vështirë për një fëmijë të vogël të kuptojë sjelljen e tyre. Studiuesit përmendin gjithashtu mundësinë e një lidhjeje me toksoplazmozën, një infeksion që mund të transmetohet përmes maceve. Megjithatë, autorët paralajmërojnë se nevojiten studime të tjera, sidomos në vende të ndryshme, për të kuptuar më mirë marrëdhënien mes kafshëve shtëpiake dhe zhvillimit psikologjik të fëmijëve.
