Kreu i SPAK, Klodian Braho, ka folur për arrestimin në Francë të Ermal Beqirajt, i shpallur në kërkim ndërkombëtar nga Prokuroria e Posaçme në kuadër të dosjes “AKSHI”. Në një takim me gazetarët, Braho u pyet nëse SPAK kishte dijeni për vendndodhjen e Beqirajt para arrestimit të tij. Sipas raportimit të gazetares së Top Channel, Anila Hoxha, kreu i Prokurorisë së Posaçme sqaroi se ndalimi i tij ishte rezultat i bashkëpunimit me autoritetet franceze dhe jo një veprim i rastësishëm.
Siç raporton gazetarja e Top Channel, Anila Hoxha, Braho deklaroi se SPAK kishte qenë prej javësh në kontakt me autoritetet franceze dhe kishte shkëmbyer informacione jo vetëm për kapjen e Beqirajt, por edhe për veprimet e tij të tjera që lidhen me hetimin.
“Prokuroria, në çdo rast, sapo merr urdhrin e gjykatës, e dërgon për ekzekutim pranë organit që ka detyrën përkatëse. Në këtë moment është bërë shpallja në kërkim ndërkombëtar dhe personi që ju përmendni është njëri prej tyre. Nuk ka qenë një veprim i rastësishëm. Prokuroria ka qenë prej javësh në kontakt me autoritetet franceze, ka ndarë informacion me francezët, jo vetëm për kapjen e tij, por edhe për veprimet e tij. Për veprime të tjera do t’ju bëjmë me dije në vijim. Prokuroria e ka ditur se ku ai ndodhej dhe ka dërguar letërporosi para se ai të arrestohej”, tha Braho.
Ermal Beqiraj u arrestua në Francë pasi ishte shpallur në kërkim ndërkombëtar me kërkesë të SPAK për dosjen “AKSHI”. Ai u ndalua nga autoritetet franceze në kuadër të bashkëpunimit mes Interpol Tiranës dhe Interpol Lion.
Sipas autoriteteve shqiptare, ndaj Beqirajt Gjykata e Posaçme ka caktuar masën e sigurisë “arrest në burg” për disa vepra penale, mes tyre “Heqja e paligjshme e lirisë”, “Konkurrenca e paligjshme nëpërmjet dhunës”, “Shkelja e barazisë së pjesëmarrësve në tendera apo ankande publike”, “Grupi i strukturuar kriminal” dhe “Pastrimi i produkteve të veprës penale”.
Biznesmeni, i cili zotëron kompaninë “Soft & Solution”, është nën hetim në kuadër të çështjes “AKSHI”, ku SPAK ka hetuar përfitimin e tenderëve me procedura të dyshuara si të parregullta, si dhe pasuritë e tij.
Beqiraj ndodhet aktualisht në paraburgim në Francë, ndërsa pritet vijimi i procedurave ligjore për ekstradimin e tij drejt Shqipërisë. Top Channel