Lodhja e pilotëve po kthehet në një shqetësim serioz për sigurinë ajrore në Europë. Sipas një sondazhi të Shoqatës Europiane të Kabinës së Pilotimit (ECA), 76,8 për qind e pilotëve kanë përjetuar të paktën një episod mikrogjumi gjatë katër javëve para anketimit, ndërsa pothuajse një në katër pranon se ka fluturuar edhe kur ishte tepër i lodhur.
Në sondazh morën pjesë 8.589 persona, nga të cilët 7.198 përgjigje u përfshinë në analizën kryesore. Rezultatet tregojnë se 38,8 për qind e pilotëve nuk kanë kohë të mjaftueshme për t'u rikuperuar mes turneve, ndërsa 35,6 për qind i konsiderojnë oraret e tyre të punës të paqëndrueshme.
Shqetësues është edhe fakti se shumë pilotë hezitojnë të raportojnë lodhjen. Edhe pse 82,3 për qind njohin procedurat e raportimit, vetëm 11,9 për qind kanë besim te sistemi. Ndërkohë, 52 për qind pranojnë se gjatë tre muajve të fundit kanë kryer të paktën një fluturim kur, për shkak të lodhjes, duhej të ishin deklaruar të papërshtatshëm për punë.
Problemi është më i theksuar në kompanitë me kosto të ulët, ku 60,2 për qind e pilotëve e vlerësojnë negativisht menaxhimin e rrezikut nga lodhja. Edhe në Itali situata është përkeqësuar, me përqindjen e pilotëve që raportojnë mungesë kohe për rikuperim që është rritur nga 26,1 për qind në vitin 2023, në 42,9 për qind në vitin 2026.
Komandanti Coen George paralajmëroi se presioni i kompanive për zgjatjen e turneve dhe kompensimin e vonesave mund të rrezikojë sigurinë e fluturimeve. Ndërsa presidentja e ECA-së, Tanja Harter, kërkoi përgjegjësi më të madhe nga kompanitë ajrore dhe autoritetet mbikëqyrëse.
Raporti nënvizon se lodhja e pilotëve nuk është vetëm çështje e kushteve të punës, por një rrezik që mund të ndikojë drejtpërdrejt në sigurinë e pasagjerëve.