Turqia po kufizon lëvizjen e anijeve tregtare që udhëtojnë drejt Detit të Zi përmes Bosforit, për shkak të shqetësimeve në rritje për sigurinë pas sulmeve ndaj anijeve në rajon, raportoi Bloomberg. Drejtoria e Përgjithshme e Sigurisë Bregdetare e Turqisë ka informuar disa anije që udhëtojnë drejt Novorossiyskut në Rusi, një qendër e rëndësishme për eksportin e naftës dhe drithërave, se aktualisht nuk po jepen leje tranziti për këto rrugë ose se aplikimet do të kërkojnë më shumë kohë për t’u shqyrtuar.
Sipas burimeve, autoritetet turke nuk kanë dhënë një shpjegim për masën. Disa anije janë njoftuar gjithashtu se kufizimi vlen edhe për ato që udhëtojnë drejt porteve ukrainase.
Të dhënat e gjurmimit të anijeve të përpiluara nga Bloomberg tregojnë se anijet që udhëtonin drejt porteve në Bullgari dhe Turqi vazhdonin të lundronin përmes Ngushticës së Dardaneleve.
Masa vjen pas një rritjeje të sulmeve ndaj anijeve tregtare në Detin e Zi, përfshirë disa anije në pronësi turke. Ankaraja ka kërkuar vazhdimisht forcimin e masave të sigurisë në këtë zonë.
Më herët gjatë kësaj jave, Ministria e Jashtme e Turqisë njoftoi se disa anëtarë ekuipazhi, mes tyre edhe shtetas turq, u plagosën pas sulmeve me dronë ndaj dy anijeve në pronësi turke.
“Ne përsërisim thirrjen tonë drejtuar të gjitha palëve, veçanërisht palëve ndërluftuese, që të zbatojnë urgjentisht masa konkrete për garantimin e sigurisë detare në Detin e Zi”, deklaroi Ministria e Jashtme turke.
Ankaraja paralajmëroi gjithashtu se përshkallëzimi i tensioneve mund të ketë pasoja të shumta, përfshirë edhe ndikimin në sigurinë ushqimore.
Kufizimet e reja mund të shtojnë presionin mbi tregtinë globale, në një kohë kur lufta dhe konfliktet në rajone të tjera kanë shkaktuar ndërprerje të konsiderueshme në flukset e naftës dhe mallrave. Sulmet e vazhdueshme Rusi-Ukrainë kanë rritur gjithashtu shqetësimet për furnizimet me drithëra nga rajoni i Detit të Zi. Top Channel