Një djalë 10-vjeçar ka arritur të mbledhë më shumë se 65 mijë paund për të ndihmuar shokun e tij më të mirë, pasi mësoi se ai po lufton me një formë të rrallë dhe agresive të kancerit.
Masion, 11 vjeç, po lufton për jetën pasi dy muaj më parë u diagnostikua me rabdomiosarkomë (Rhabdomyosarcoma), një lloj i rrallë dhe agresiv i kancerit. Aktualisht ai po i nënshtrohet një trajtimi të vështirë me kimioterapi, pasi mjekët zbuluan më në fund një masë në këmbën e tij. Ekzaminimet e mëtejshme treguan se sëmundja ishte përhapur në ijë, kraharor dhe shtyllën kurrizore.
Familjes iu desh të luftonte për të marrë përgjigje, pasi fillimisht iu ishte thënë se shenjat në trupin e djalit mund të ishin pasojë e ngacmimeve nga bashkëmoshatarët. Më pas erdhi lajmi tronditës: Masion ka vetëm 20% mundësi mbijetese.
Por në këtë betejë ai nuk është vetëm.
Shoku i tij më i mirë, 10-vjeçari Oscar Steers, vendosi të bëjë gjithçka që mundet për ta ndihmuar. Oscar u transferua me familjen e tij në Chichester, West Sussex, nga Chertsey, Surrey, kur ishte vetëm pesë vjeç. Që në ditën e parë të shkollës ai krijoi një miqësi të fortë me Masion.
Me mbështetjen e nënës së tij, Ellie, ai nisi një fushatë për të mbledhur 1,000 paund, duke premtuar se do të vraponte nga një milje çdo ditë për 30 ditë dhe duke u kërkuar banorëve të zonës ta sponsorizonin.
Paratë do të ndihmonin Masion dhe familjen e tij të gjenin trajtimin më të mirë të mundshëm, përfshirë edhe trajtime potencialisht jetëshpëtuese.
Por Oscar e tejkaloi objektivin e tij prej 1,000 paundësh brenda pak minutash, pasi njerëz të shumtë u bashkuan me përpjekjen e tij për të ndihmuar shokun të luftojë për jetën. Deri tani, fushata ka mbledhur më shumë se 65 mijë paund, ndërsa Oscar po mendon tashmë se çfarë tjetër mund të bëjë për të ndihmuar mikun e tij të ketë mundësi të provojë edhe trajtime novatore dhe shumë të kushtueshme, të cilat ofrohen vetëm jashtë vendit.