Një muaj pas denoncimit për gjendjen e rëndë të rrugës që të çon drejt varrezave të fshatit Bogovë, banorët rikthehen me të njëjtin shqetësim: problemi kryesor vijon të mbetet i pazgjidhur.
Një qytetar tregon se pas publikimit të shqetësimit, është ndërhyrë për të pastruar disa shkallë, por rruga nuk është rregulluar. Sipas tij, kjo ndërhyrje nuk mjafton për të zgjidhur problemin dhe as për të garantuar kalim të sigurt për banorët që shkojnë të vizitojnë varret e familjarëve të tyre.
Banorët theksojnë se nuk kërkojnë luks apo investime të tepërta, por një rrugë të sigurt dhe të denjë për të shkuar te vendi ku prehen prindërit, gjyshërit dhe njerëzit e tyre të dashur. Ata shprehen se nuk është normale që një vizitë në varreza të shoqërohet me frikë për shkak të gjendjes së rrugës.
Për ta, pastrimi i disa shkallëve është vetëm një ndërhyrje sipërfaqësore, ndërsa nevojitet një zgjidhje konkrete dhe përfundimtare. Për këtë arsye, ata u bëjnë thirrje institucioneve përgjegjëse që të shkojnë në terren, të konstatojnë nga afër problematikën dhe të ndërhyjnë për rregullimin e plotë të rrugës.
Një muaj pas denoncimit të parë, banorët presin ende që shqetësimi i tyre të marrë zgjidhjen e duhur. Sepse respekti për të ndjerët nuk duhet të mbetet vetëm në fjalë, ndërsa rruga drejt varreve të njerëzve të dashur nuk duhet të jetë një pengesë për ata që duan t'i kujtojnë dhe t'i vizitojnë.