Një hetim i Grizzly Research e vendos Raiffeisen Bank në qendër të skemave që kanë ndihmuar Rusinë të anashkalojë sanksionet perëndimore. Raporti gjurmoi 1.19 miliardë dollarë tregti me mallra nën kufizime në kontrata të regjistruara përmes bankës, përfshirë pajisje dhe komponentë të rëndësishëm për industrinë ruse të luftës. Pas publikimit të hetimit, aksionet e Raiffeisen ranë deri në 9%. Raiffeisen Bank International është vënë nën presion pas publikimit të një raporti të Grizzly Research, i cili pretendon se dega ruse e bankës është kthyer në një kanal të rëndësishëm për anashkalimin e sanksioneve në ekonominë ruse të luftës, ndërkohë që grupi ka deklaruar publikisht se po redukton aktivitetin e tij në vend.
Raporti, i publikuar më 17 shtator, bazohet në një hetim disamujor, në të dhëna doganore ruse dhe në biseda të fshehta me më shumë se një duzinë drejtuesish të Raiffeisenbank në Rusi. Grizzly thotë se ka identifikuar 19,664 regjistrime doganore me një vlerë totale prej 1.19 miliardë dollarësh, të lidhura me kontrata që mbanin kodin e regjistrimit bankar 3292 të AO Raiffeisenbank. Mallrat përputheshin me kategori që në datat përkatëse ishin objekt i sanksioneve ose kontrolleve të eksportit të BE-së, SHBA-së, Britanisë së Madhe ose Zvicrës.
Mes tyre, rreth 106.75 milionë dollarë përfshinin mallra të “Common High Priority List”, ku futen produkte që qeveritë perëndimore i konsiderojnë veçanërisht të rëndësishme për industrinë ruse të luftës. Hetimi evidenton dylbi optike dhe termike për armë, kushineta të përdorura edhe në tanket ruse, pajisje komunikimi, qarqe të integruara dhe makineri CNC të të njëjtit lloj me ato që përdoren nga industria ruse për prodhimin e komponentëve të raketave.
Një nga rastet e paraqitura në raport lidhet me Alfa Machinery Group, kompani ruse e sanksionuar nga Shtetet e Bashkuara në nëntor 2023 për furnizimin e prodhuesve rusë me pajisje. Grizzly identifikoi 33.95 milionë dollarë importe të kompanisë që përputheshin me kufizimet në fuqi në datat e analizuara, ndërsa regjistrimet përmbanin kodin e Raiffeisenbank.
Raporti evidenton gjithashtu tregti të regjistruar në kontrata me kodin e Raiffeisenbank me Iranin dhe Korenë e Veriut. Vetëm për Korenë e Veriut, Grizzly thotë se gjeti rreth 8.76 milionë dollarë tregti të regjistruar nga nëntori 2022 deri në janar 2025. Një kontroll tjetër i të dhënave identifikoi 49 milionë dollarë tregti me të paktën 33 palë gjatë periudhave kur ndaj tyre ishin në fuqi sanksione.
Por pjesa më e fortë e hetimit vjen nga bisedat e fshehta të zhvilluara me punonjës të bankës në Rusi.
Në një prej tyre, hetuesit u paraqitën si klientë që kërkonin të importonin mallra në Rusi, t'ua shisnin një pjesë klientëve ushtarakë rusë dhe pjesën tjetër ta dërgonin në Iran, duke përdorur Raiffeisenbank si ndërmjetëse.
Sipas materialit të publikuar nga Grizzly, përgjigjja e një menaxhereje të bankës ishte: “Kemi vetëm një kufizim për Iranin: nuk u dërgojmë euro.”
Në një tjetër test, disa drejtues të bankës thanë se një fond që mblidhte para për blerjen e dronëve për luftën ruse mund të hapte llogari. Në një rast, një menaxhere e konfirmoi këtë pasi u konsultua me eprorin e saj.
Grizzly ngre një tjetër problem për Raiffeisen: miliardat që vazhdojnë të mbeten në Rusi. Sipas analizës, 12.6 miliardë euro cash janë të lidhura me biznesin rus dhe jashtë mundësisë së grupit në Vjenë për t'i transferuar lirisht. Pjesa më e madhe përbëhet nga depozita pranë Bankës Qendrore të Rusisë. Raporti llogarit gjithashtu se aktiviteti rus përbënte rreth 39% të rezultatit operativ të RBI-së në vitin 2025.
Publikimi i raportit u reflektua menjëherë në bursë. Aksionet e Raiffeisen Bank International ranë deri në rreth 9% në Vjenë, ndërsa investitorët reaguan ndaj akuzave dhe rrezikut që vazhdon të shoqërojë aktivitetin e bankës në Rusi.
Grizzly Research ka një pozicion “short” ndaj aksioneve të RBI-së, çka do të thotë se firma përfiton financiarisht nga rënia e tyre. Firma e deklaron këtë interes në raportin e publikuar.
Raiffeisen Bank International i hodhi poshtë akuzat. Banka tha se një shqyrtim fillestar i raportit kishte identifikuar deklarata “të pasakta dhe çorientuese”, si dhe gabime faktike. RBI deklaroi se disa prej kompanive të përmendura nuk kishin qenë klientë të saj, ndërsa në raste të tjera marrëdhëniet ishin ndërprerë përpara vendosjes së sanksioneve. Banka mbrojti sistemet e saj të kontrollit dhe bëri të ditur se po shqyrton edhe mundësinë e veprimeve ligjore.
Grizzly, nga ana tjetër, u ka kërkuar Autoritetit Austriak të Tregjeve Financiare, Bankës Qendrore Evropiane, Komisionit Evropian dhe Departamentit amerikan të Thesarit të hapin hetime zyrtare mbi kontrollet e sanksioneve në Raiffeisen. /Pamfletiraiffeisen bank rusia Lini një Përgjigje Anuloje përgjigjen Ekonomi Sa do të kushtojë zhdoganimi i makinave? Publikohet manuali, si do të bëhet llogaritja sipas skemës së re 18 Shtator 2026, 18:2118:21Ekonomi Gati gjysma shqiptarë mezi mbyll muajin/ Shqipëria e dyta në Europë për vështirësitë ekonomike 18 Shtator 2026, 07:3307:33Ekonomi Euro në pikë kritike, mësoni me sa këmbehen monedhat e huaja sot 18 Shtator 2026, 07:1807:18Ekonomi Më e keqja s’ka ardhur akoma, çmimi i naftës do të rritet sërish! 17 Shtator 2026, 22:3222:32Ekonomi Shtrenjtohet zhdoganimi i makinave, si do të llogaritet vlera dhe sa mund të paguajnë qytetarët 17 Shtator 2026, 19:5619:56Ekonomi Aeroporti i Vlorës rindez përplasjen Rama-Pacolli, kush fitoi në Arbitrazhin e Londrës? 17 Shtator 2026, 17:4117:41Ekonomi