Një tjetër shqetësim vjen nga transporti urban në Tiranë, këtë herë nga linja Kombinat–Tufinë, ku një qytetar pretendon se është përballur me një situatë absurde gjatë kontrollit të biletës.
Qytetari, i cili deklaron se është person me aftësi të kufizuara dhe disponon edhe librezën përkatëse, thotë se ka hipur në urban rreth orës 08:03, duke pasur me vete dokumentet që ishin ende brenda afatit të vlefshmërisë.
Por gjatë kontrollit, situata është kthyer në debat. Sipas qytetarit, kontrollori i ka thënë se dokumenti kishte skaduar që në muajin korrik dhe e ka paralajmëruar se do ta gjobiste.
“Jam invalid dhe kam librezë invalidi. Libreza më mbaron më 1 nëntor 2026, ndërsa ai më thoshte se e kam mbaruar në korrik dhe do të më vërë gjobë”, shprehet qytetari në denoncimin e dërguar.
Pikërisht këtu lind edhe pyetja më e madhe: si mund të kërkohet pagesa e një gjobe ndaj një qytetari, nëse dokumentet që ai paraqet rezultojnë të vlefshme?
Qytetari ka dërguar edhe fotografitë e dokumenteve, duke kërkuar që rasti të bëhet publik dhe të sqarohet se mbi çfarë baze është konsideruar i pavlefshëm dokumentacioni i tij.
Por përtej një bilete urbani, rasti ngre një problem edhe më serioz: mënyrën se si trajtohen qytetarët gjatë kontrolleve në transportin publik. Nëse një dokument është i vlefshëm, qytetari nuk mund të kthehet automatikisht në “shkelës” vetëm sepse kështu pretendon një kontrollor. Nëse dokumenti nuk është i vlefshëm, atëherë duhet të bëhet e qartë rregulla dhe baza mbi të cilën vendoset gjoba.
Transporti urban është një shërbim që paguhet nga qytetarët dhe kontrolli duhet të shërbejë për zbatimin e rregullave, jo për të krijuar situata presioni apo konflikti me pasagjerët.
Në këtë rast, qytetari kërkon vetëm një gjë: qartësi dhe verifikim. Nëse ka gabuar, le të shpjegohet publikisht se ku qëndron shkelja. Por nëse dokumentet janë vërtet të vlefshme, atëherë pyetja është e thjeshtë: kush do të mbajë përgjegjësi për një gjobë të vendosur padrejtësisht?
Rasti mbetet për t’u verifikuar nga operatori i linjës dhe institucionet përgjegjëse për transportin urban në Tiranë.