Vetëm pak ditë pasi njoftoi shtetëzimin e shërbimit të dializës pas përfundimit të koncesionit 10-vjeçar, qeveria shqiptare ka vendosur sërish ta kalojë ofrimin e këtij shërbimi te një operator privat. Sipas Kapitali, Operatori i Shërbimeve të Integruara të Sterilizimit ka shpallur në regjistrin e parashikimeve të Agjencisë së Prokurimit Publik një tender me vlerë 4.6 miliardë lekë, rreth 49 milionë euro, për ofrimin e shërbimit të dializës në pesë spitale publike. Shërbimi parashikohet të ofrohet për një periudhë katërvjeçare në spitalet e Shkodrës, Lezhës, Korçës, Vlorës dhe Elbasanit.
Vendimi vjen pasi, në fund të korrikut, qeveria njoftoi se pas përfundimit të koncesionit 10-vjeçar, shërbimi i dializës do të merrej në administrim nga shteti.
Përmes një vendimi të posaçëm, Këshilli i Ministrave ngarkoi Operatorin e Shërbimeve të Integruara të Sterilizimit me ofrimin e dializës, por edhe të shërbimit të kontrollit bazë mjekësor të popullatës, i njohur si check-up.
“Shërbimi i check-up-it dhe ai i dializës do të merren në dorëzim dhe do të ofrohen nga shteti”, deklaroi ministrja e Shëndetësisë, Evis Sala, pas mbledhjes së qeverisë më 30 korrik.
Megjithatë, sipas Kapitalit, procedura e re e prokurimit tregon se shteti nuk do ta ofrojë drejtpërdrejt shërbimin e dializës në këto pesë spitale. Përmes tenderit, një operator privat do të përzgjidhet për të ofruar shërbimin për katër vitet e ardhshme, kundrejt një fondi prej rreth 49 milionë eurosh.
Në këtë mënyrë, shërbimi që u prezantua si i rikthyer në duart e shtetit pas përfundimit të koncesionit, do të vijojë të ofrohet përmes një subjekti privat, por tashmë përmes një procedure të re prokurimi. Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm