Një qytetar ka denoncuar punimet që po kryhen gjatë orëve të natës në rrugën pranë Liqenit të Thatë në Tiranë.
Sipas tij, prej tre ditësh punimet nisin rreth orës 22:00 dhe vijojnë gjatë gjithë natës, duke shkaktuar zhurmë të madhe dhe shqetësim për banorët e zonës.
“Na çmendën. Nuk bëhen punimet në këtë orë, zhurmë e tmerrshme”, shprehet qytetari, duke kërkuar ndërhyrjen e institucioneve për të verifikuar situatën.
Ai ngre gjithashtu pikëpyetje mbi punimet e kryera, duke treguar se deri tani nuk është e qartë se çfarë pune është bërë konkretisht.
Banori kërkon që autoritetet të marrin masa për të shmangur zhurmat gjatë natës dhe të sqarojnë arsyen e zhvillimit të punimeve në këto orare.