Propozimi i Partisë Socialiste për reformën e re administrativo-territoriale, që parashikon uljen e numrit të bashkive nga 61 në 46, po shndërrohet në një nga debatet më të ashpra brenda vetë mazhorancës. Ajo që nisi si kundërshtim i banorëve në disa qytete, tashmë është kthyer në një valë reagimesh publike nga kryebashkiakë dhe deputetë të Partisë Socialiste, të cilët kundërshtojnë hapur draftin e propozuar.
Në ditët e fundit, protestat janë zhvilluar në disa nga bashkitë që rrezikojnë të shkrihen sipas hartës së re.
Banorët kanë dalë në sheshe duke kundërshtuar bashkimin e njësive të tyre me bashki më të mëdha, me argumentin se reforma do t'i largojë shërbimet publike dhe do të dëmtojë përfaqësimin lokal.
Protestat në qytete
Shenja e parë e përplasjes brenda Partisë Socialiste u shfaq në Poliçan, ku kryetari i PS-së në Poliçan dha dorëheqjen nga funksioni, duke deklaruar se nuk mund të mbështeste një projekt që, dëmton interesat e qytetit. Paralelisht, një grup anëtarësh dhe mbështetësish socialistë dogjën publikisht teserat e Partisë Socialiste në shenjë proteste ndaj planit për shkrirjen e bashkisë. Në Maliq, qytetarët dolën kundër planit që bashkia e tyre të bashkohet me Korçën.
"Maliqi nuk është trajtuar si duhet, është bërë kurban i politikës", u shpreh një banor. Një tjetër paralajmëroi se bashkimi me Korçën do të krijojë vështirësi të mëdha për qytetarët.
"Qytetarët do të kishin krizë direkt, distanca është shumë larg. I kemi këtu shërbimet, të ikim në Korçë?"
Protesta dhe kundërshtime janë shfaqur edhe në bashki të tjera.
Me pankarta në duar, dhjetëra qytetarë të Patosit kanë protestuar paraditen e sotme kundër ‘Territoriales' dhe shkrirjes së kësaj bashkie me Fierin. Me thirrjet “ Larg duart nga Patosi” ata kanë pohuar njëzëri se ky vendim cenon identitetin e qytetit të naftëtarëve. Libohova, që sipas draftit të mazhorancës pritet t’i bashkohet Gjirokastrës, është e para që ka mbledhur Këshillin Bashkiak, ku si rrallë herë të majtë e të djathë janë bërë bashkë: kundër shkrirjes së bashkisë Libohovë. Këtë qëndrim unanim të të gjithë këshilltarëve bashkiak pritet t’ia çojnë qeverisë me shpresën se vendimi i tyre do të merret parasysh.
Ndërsa në Rrogozhinë, e cila pritet të bashkohet me Kavajën janë punonjësit e bashkisë ata të cilët e kanë kundërshtuar bashkimin duke pezulluar për pak çaste punën mëngjesin e kësaj të hëne, në shenjë demonstrative kundër propozimit të socialistëve.
Edhe bashkia Klos, e cila pritet t’i bashkohet Matit do të mbajë qëndrimin e saj zyrtar. Anëtarët e Këshillit Bashkiak kanë kërkuar një mbledhje urgjente, ku pritet të diskutohet qëndrimi institucional i këshillit ndaj projektit të reformës administrativo-territoriale.
Kryebashkiakët e PS kundër draftit
Një nga reagimet më të forta erdhi nga kryebashkiaku socialist i Patosit, Fation Duro, i cili kundërshtoi bashkimin e Patosit me Fierin.
Duro solli në vëmendje vetë raportin e Komisionit për Reformën Territoriale.
"Patosi nuk është bashki me performancë të dobët. Përkundrazi, në treguesit më të rëndësishëm renditet ndër bashkitë më të mira të Shqipërisë", deklaroi ai.
Kryetarja e Bashkisë Dimal, Juliana Memaj ka dalë hapur kundër propozimit të Partisë Socialiste për reformën territoriale. Memaj kundërshton bashkimin e bashkisë që ajo drejton me Bashkinë Berat, ndërsa theksoi se kanë kaluar vetëm katër vite që kur njësia vendore mori emrin Bashkia Dimal.
“Në vitin 2021, në fund të prillit, mori emrin Bashkia Dimal. Shumë keq që dimaliotët të mos e gëzonin shtëpinë e tyre të re”, deklaroi ajo.
Po ashtu, kryebashkiakja socialiste akuzoi se vendimi është marrë në mungesë transparence, pasi, sipas saj, treguesit e bashkisë që ajo drejton janë pozitivë. Kryetari i Bashkisë së Divjakës, Josif Gorrea, ka dalë hapur kundër propozimit të Partisë Socialiste . Gjatë një proteste të zhvilluar së bashku me qytetarët, kryebashkiaku socialist u shpreh se lajmi për përfshirjen e Divjakës në listën e bashkive që do të shkrihen i ka ardhur si një “bombë”, duke theksuar se është ndjerë i tradhtuar nga mënyra se si është bërë publik ky propozim. Deputetët socialistë dalin hapur kundërPak ditë më vonë, kundër draftit doli edhe deputeti i PS-së për Vlorën, Vullnet Sinaj, i cili kundërshtoi shkrirjen e Bashkisë Selenicë. "Mendimi im është që duhet dëgjuar zëri i ekspertëve, por mbi të gjitha zëri dhe interesi i qytetarëve", shkroi ai.
Sinaj argumentoi se problemi nuk është numri i bashkive, por mungesa e financimit të pushtetit vendor.
"Nëse do të bënim një ndarje të drejtë të buxhetit të shtetit, nuk do të kishim nevojë të zvogëlonim numrin e bashkive, por të rrisnim financimin e tyre", u shpreh deputeti.
Rama: Kundërshtimet janë normalePërballë valës së reagimeve, kryeministri Edi Rama iu përgjigj kritikiëve përmes një postimi në rrjetet sociale, duke minimizuar zërat kundërshtues.
Ai tha se konsultimi publik është pikërisht faza ku secili ka të drejtë të shprehë mendimin.
"Gjithçka tjetër është jo vetëm normale, por edhe e mirëseardhur", shkroi Rama.
Sipas tij, kryetarët e bashkive kanë detyrim ligjor të paraqesin qëndrimet e tyre dhe askush nuk do të pengohet të shprehë opinionin.
Opozita: Konsultim formal për një vendim të marrëDeklaratat e Ramës sollën reagimin e menjëhershëm të opozitës.
Kryetari i Grupit Parlamentar të PD-së, Gazment Bardhi, deklaroi se konsultimi është vetëm formal dhe se vendimi është marrë prej kohësh.
"Edi Rama nuk po zhvillon një konsultim për hartën administrativo-territoriale. Po zhvillon një konsultim formal për një vendim të paracaktuar", u shpreh Bardhi.
Ai shtoi se socialistët po protestojnë sepse "refuzojnë të bëhen sërish kavje për vendimet e çmendura të kryeministrit të tyre".
Ndërsa konsultimi publik 60-ditor vijon, lista e zyrtarëve socialistë që kërkojnë ndryshimin e hartës territoriale duket se po zgjerohet, duke e kthyer reformën në një nga debatet më të mëdha politike për mazhorancën në këtë mandat/ Politiko.al Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm