Një qytetare që ka një pronë në Sarandë i është drejtuar redaksisë së JOQ Albania për të denoncuar një problem që, sipas saj, prej vitesh prek banorët e më shumë se 50 apartamenteve, si dhe bizneset pranë zonës.
Sipas qytetares, pallati është shitur dhe apartamentet janë blerë nga qytetarë, të cilët disa vite më vonë kanë mësuar se objekti ishte ndërtuar pa gropë septike, megjithëse ishte pajisur me leje nga bashkia.
Ajo thotë se banorët kanë vendosur të investojnë vetë për ndërtimin e një grope septike, por prej rreth 4 vitesh kërkesa për lejen e fillimit të punimeve nuk ka marrë, sipas saj, një zgjidhje konkrete nga Bashkia Sarandë.
Në videon e dërguar në redaksi shihen ujëra të ndotura dhe mbetje në zonën pranë banesave, ndërsa qytetarja ngre shqetësimin për erën e rëndë, papastërtitë dhe praninë e mushkonjave.
Sipas saj, situata prek edhe bizneset përreth dhe krijon shqetësim për turistët që frekuentojnë zonën.
“Ky nuk është një problem estetik. Ky është një problem i shëndetit publik dhe i dinjitetit njerëzor.”
Qytetarja pretendon gjithashtu se gjatë vitit 2025, si dhe rreth një javë para dërgimit të denoncimit, në zonë kanë mbërritur përfaqësues të Task-Forcës, por sipas saj nuk është dhënë ende një përgjigje konkrete.
Ajo ngre shqetësime edhe për praninë e minjve dhe gjarpërinjve në zonë, të cilën e lidh me grumbullimin e ujërave të zeza dhe mbetjet.
Banorët, sipas qytetares, nuk kërkojnë një zgjidhje të përkohshme, por ndërhyrje konkrete për një problem që pretendon se vijon prej pesë vitesh.
“Banorët nuk kërkojnë mrekulli. Kërkojnë zgjidhje. Pas 5 vitesh pritje, është koha për veprime konkrete. Mjaft më me fjalë boshe. Saranda meriton respekt, banorët e saj meritojnë respekt.”
Pretendimet e qytetares lidhur me lejet, përgjegjësinë institucionale dhe rrezikun shëndetësor kërkojnë verifikim nga autoritetet përkatëse.
JOQ Albania publikon pamjet dhe denoncimin, ndërsa mbetet e hapur për një reagim nga Bashkia Sarandë dhe institucionet përgjegjëse lidhur me situatën dhe zgjidhjen e saj. View this post on Instagram A post shared by JOQ News (@joqnews)