Islanda dhe Mali i Zi mund të bashkohen me Bashkimin Evropian së bashku në vitin 2028 nëse islandezët votojnë në një referendum në gusht për të rifilluar bisedimet e anëtarësimit, raportoi Politico. Sipas gazetës, Komisionerja Europiane për Zgjerimin, Marta Kos, e përshkroi Islandën si një “rast të veçantë” për shkak të pjesëmarrjes së saj në Zonën Ekonomike Europiane dhe Zonën Shengen. Ajo sugjeroi që negociatat mund të zgjasin “një deri në dy vjet” nëse islandezët vendosin t’i rifillojnë ato më 29 gusht. Islanda do të ishte kështu në të njëjtin nivel me Malin e Zi, i cili ka mbyllur përkohësisht më shumë se gjysmën e 33 kapitujve të negociatave dhe synon të bashkohet me bllokun deri në vitin 2028, shpjegoi Politico. Një zyrtar tjetër tha se pranimi i njëkohshëm ishte një skenar shumë i mundshëm. Si një vend i zhvilluar ekonomikisht, Islanda mund të bëhet një kontribues neto në buxhetin e BE-së, duke ndihmuar në kompensimin e kostos së anëtarësimit të Malit të Zi. Mali i Zi do të bëhej një nga anëtarët më të varfër të bllokut. Ministrja malazeze e Çështjeve Evropiane, Maida Gorcevic, tha se Podgorica do të mirëpriste lidhjen e kërkesës së saj me atë të Islandës dhe bashkimin e saj me BE-në. Ministrja e Jashtme islandeze, Thorgerdur, Katrin Gunnarsdottir, tha gjithashtu se pranimi i njëkohshëm ishte plotësisht i mundur, varësisht nga progresi i negociatave.
Islanda ka një popullsi prej rreth 400,000 banorësh. Nëse i bashkohet BE-së, do të bëhet vendi me popullsinë më të vogël të bllokut, e ndjekur nga Malta, e cila ka një popullsi prej 590,000 banorësh. Anëtarësimi i njëkohshëm nuk është pa precedent në historinë e BE-së. Spanja dhe Portugalia u bashkuan në vitin 1986. Bullgaria dhe Rumania hynë në bllok në vitin 2007, pasi shtetet anëtare ratifikuan një traktat të vetëm për anëtarësimin e tyre. Dhjetë vende u bashkuan me BE-në në të njëjtën kohë në vitin 2010 sipas një traktati të vetëm. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb