Përplasja e fortë që ka shpërthyer në majat e futbollit botëror vazhdon. UEFA, CONCACAF dhe AFC kanë dalë me një deklaratë të përbashkët kundër mënyrës së qeverisjes së FIFA-s dhe presidentit të saj, Gianni Infantino, duke kërkuar që drejtimi i futbollit të bazohet te transparenca, konsultimi dhe respekti për institucionet e këtij sporti.
Presidentët e tre konfederatave, Alexander Čeferin i UEFA-s, Salman Bin Ibrahim Al Khalifa i AFC-së dhe Victor Montagliani i CONCACAF-it, kanë nënshkruar një letër të hapur në të cilën kritikojnë sjelljen e fundit të FIFA-s dhe veçanërisht mënyrën se si është menaxhuar një plan i fundit i Infantinos për Kupën e Botës.
“Forca e futbollit ka qenë gjithmonë uniteti i tij. Ne bëjmë thirrje që ky unitet të nderohet tani, për një lidership që i shërben lojës, jo që kërkon ta dominojë atë”, thuhet në deklaratë.
Tre konfederatat theksojnë se futbolli nuk i përket një individi apo një institucioni të vetëm, por lojtarëve, tifozëve, klubeve, federatave dhe strukturave që kanë për detyrë të mbrojnë të ardhmen e sportit.
Në letrën e tyre, UEFA, CONCACAF dhe AFC pranojnë se futbolli ka përjetuar një zhvillim të rëndësishëm gjatë dekadës së fundit, por kundërshtojnë çdo përpjekje për t’ia atribuar këtë progres një individi të vetëm.
Sipas tyre, zgjerimi i turneve, organizimi i Kupave të Botës 2030 dhe 2034 dhe shpërndarja e burimeve financiare kanë qenë vendime të përbashkëta dhe rezultate të arritura nga i gjithë komuniteti i futbollit.
Konfederatat mohojnë gjithashtu se përplasja e tyre me FIFA-n lidhet me paratë.
“Kjo nuk ka të bëjë me paratë”, theksojnë ato, duke shtuar se kanë kërkuar tashmë një përdorim të përgjegjshëm të rezervave të konsiderueshme të FIFA-s për të rritur investimet në zhvillimin e federatave anëtare.
Pika më e fortë e letrës lidhet me planin e fundit të Gianni Infantinos për të ndryshuar mënyrën e menaxhimit të Kupës së Botës, një ide që tashmë është braktisur.
Tre konfederatat argumentojnë se problemi nuk qëndron te zgjerimi i garave apo vendimet për organizimin e Botërorëve të ardhshëm, por te mënyra se si u mor dhe u prezantua propozimi.
“Udhëheqja në futboll nuk është një zotërim. Nuk ka të bëjë me mbajtjen ose pretendimin e pushtetit. Është një detyrë shërbimi ndaj familjes së futbollit që ta beson atë”, thuhet në letër.
Sipas UEFA-s, CONCACAF-it dhe AFC-së, propozimi iu paraqit federatave në një kohë shumë të shkurtër, pa konsultime të mjaftueshme dhe me një afat që nuk u lejonte atyre të shqyrtonin siç duhet kushtet.
Konfederatat e cilësojnë këtë jo thjesht si një “gabim komunikimi”, por si një gabim serioz gjykimi dhe një shkelje të besimit.
Një tjetër pikë e rëndësishme e deklaratës është kërkesa që shqyrtimi i situatës të mos bëhet vetëm nga vetë FIFA.
FIFA është zotuar të përgatisë një raport të plotë mbi ngjarjet dhe t’ia paraqesë atë Këshillit të saj. Por UEFA, CONCACAF dhe AFC argumentojnë se, përballë një gabimi kaq serioz, shqyrtimi duhet të kryhet nga një palë e tretë, plotësisht e pavarur.
Sipas tyre, një hetim i kryer nga vetë FIFA, stafi i saj ose persona të tjerë me interesa të drejtpërdrejta në institucion nuk do të garantonte nivelin e nevojshëm të pavarësisë.
Tre konfederatat kanë ngritur gjithashtu pikëpyetje për një takim të zhvilluar në Marok.
Sipas tyre, vetëm një zyrtar i zgjedhur ishte i pranishëm në takimin e samitit, ndërsa asnjë anëtar i Këshillit të FIFA-s apo përfaqësues i federatave anëtare nuk u ftua të merrte pjesë.
Ata kritikojnë edhe faktin që takimi u zhvillua jashtë Zyrihut, selisë së FIFA-s, dhe jo në kuadër të një mbledhjeje të plotë të strukturave përkatëse.
“Kjo nuk është sjellja e një kujdestari të lojës, por e dikujt që beson se loja është përgjegjëse ndaj tyre”, thuhet në deklaratë.
Sipas konfederatave, në këtë proces ka pasur “heshtje aty ku duhet të ketë përgjegjësi” dhe “distancë aty ku duhet të ketë transparencë”.
Në përfundim, UEFA, CONCACAF dhe AFC theksojnë se qëndrimi i tyre është marrë bashkërisht dhe në emër të interesit të futbollit, duke kërkuar një model drejtimi që i shërben sportit dhe jo një individi. Top Channel