Pas 25 muajsh në paraburgim, ish-ministri i Shëndetësisë Ilir Beqaj ka reaguar pas vendimit të gjykatës që i ndryshoi masën e sigurisë në “arrest shtëpie”. Në deklaratën e tij, Beqaj këmbënguli se “nuk kam qenë asnjë ditë i burgosur”, duke sqaruar se sipas tij një person quhet i burgosur vetëm pas një vendimi të formës së prerë. Ai e cilësoi qëndrimin në paraburgim si të pajustifikuar dhe tha se afatet ligjore kishin përfunduar.
Ish-ministri deklaroi se ndaj tij nuk ka ende një vendim dënimi dhe se gjatë hetimeve të SPAK-ut nuk është gjetur asnjë provë për paligjshmëri të pasurisë së tij. Me tone ironike, ai u shpreh se tashmë do të rikthehet pranë familjes dhe do t’i ndjekë proceset gjyqësore “jo më nga kafazi i sigurisë”, ndërsa përmendi edhe jetën e re pas daljes nga qelia, duke iu referuar me tallje edhe “divanit” ku do të qëndrojë gjatë masës së re të sigurisë.
Në fund të reagimit, Beqaj iu rikthye përplasjes me Sali Berishën, duke thënë se nuk do t’i përgjigjet menjëherë deklaratave të tij, por se në vjeshtë do t’i japë mundësinë të flasë më shumë kur të paraqitet si dëshmitar në procesin për koncesionin e instrumenteve kirurgjikale. “Rishihemi në shtator”, e mbylli ai deklaratën me një dozë ironie politike.