Një sherr që nisi në TikTok rrezikoi të kthehej në përplasje mes 23 të miturve, nga 13 deri në 17 vjeç, në Yzberisht. Debati fillimisht kishte nisur mes dy të rinjve në rrjetet sociale, por më pas secili kishte mbledhur shokët e vet dhe dy grupet nisën të sfidonin njëri-tjetrin. Nga mesazhet online, ku shkëmbeheshin provokime dhe “sfida” për të treguar se kush ishte më i forti në lagje, të rinjtë kishin lënë takim në rrugën “Besim Alla” për t’u përballur.
Por “sqarimi” nuk do të bëhej vetëm me fjalë. Disa prej të miturve kishin marrë me vete shkopinj bejsbolli, ndërsa në momentin e ndërhyrjes u sekuestruan dy të tillë. Të rinjtë u shoqëruan dhe u identifikuan të gjithë pjesëtarët e grupeve, ndërsa në prani të prindërve dhe psikologut nisi procedimi në gjendje të lirë për 23 të mitur.
Ngjarja tregon edhe një herë se sa shpejt një debat banal në rrjetet sociale mund të kalojë nga ekrani në rrugë. Një koment, një video apo një provokim në TikTok mjaftoi që dy grupe adoleshentësh të caktonin vendin e takimit dhe të përgatiteshin për përplasje. Nga “kush është më i forti në TikTok” te shkopinjtë e bejsbollit ishte vetëm një hap.