Bisedimet mes presidentit rus Vladimir Putin dhe të dërguarve specialë të presidentit amerikan Donald Trump, Steve Witkoff dhe Jared Kushner, kanë përfunduar në Kremlin pas rreth dy orësh e gjysmë diskutimesh. Në takim morën pjesë edhe ndihmësi presidencial rus Yuri Ushakov, kreu i delegacionit rus për negociatat me Ukrainën, Vladimir Medinsky, si dhe drejtori i Fondit Rus të Investimeve Direkte (RDIF), Kirill Dmitriev. Gjatë bisedimeve, Putin lëshoi një paralajmërim të fortë ndaj Perëndimit, duke deklaruar se çdo vendosje e trupave të huaja në territorin ukrainas pas arritjes së një marrëveshjeje paqeje do të konsiderohet objektiv legjitim për ushtrinë ruse dhe do të çojë në rifillimin e menjëhershëm të luftimeve. “Evropianët e dinë këtë. Çfarë po na thonë? Se pas një marrëveshjeje paqeje, ata do të dërgojnë menjëherë trupa në territorin ukrainas. Ne e kemi diskutuar tashmë këtë. Për ne, ky është një objektiv legjitim, që do të thotë se lufta do të rifillojë menjëherë”, deklaroi Putin, sipas agjencisë ruse TASS. Kreu i Kremlinit foli gjithashtu për mundësinë e zhvillimit të një operacioni humanitar për pastrimin e minave pranë qytetit të Konstantinovkës. Sipas tij, Rusia do të kishte nevojë për pesë ditë për të realizuar operacionin. Putin propozoi që misioni të zhvillohet nën mbikëqyrjen e Komisioneres Ruse për të Drejtat e Njeriut, Yana Landratova, dhe Avokatit të Popullit të Ukrainës, Dmytro Lubynets. Ai pretendoi se Rusia kontrollon qytetin dhe është e gatshme të garantojë sigurinë e operacionit humanitar.
“Nëse, siç pretendojnë autoritetet ukrainase, ata e kontrollojnë këtë qytet, le të sigurojnë sigurinë e tyre”, u shpreh presidenti rus.
Putin përmendi gjithashtu përvojën e bashkëpunimit me palën ukrainase gjatë një misioni të ngjashëm në Oleski, në rajonin e Khersonit, të cilin e cilësoi pozitiv. Ai falënderoi edhe Zonjën e Parë të SHBA-së, Melania Trump, për ndihmën në organizimin e këtij procesi. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb

