Përmirësimi i kujdesit në repartet e maternitetit ka ulur rrezikun e vdekjes së foshnjave gjatë procesit të lindjes, një problem që mbetet ende i lartë në Afrikën subsahariane. Riorganizimi dhe përmirësimi i kujdesit shëndetësor për gratë gjatë procesit të lindjes ka bërë të mundur uljen me 22% të vdekjeve neonatale të ndodhura gjatë 24 orëve të para pas lindjes, si dhe ka reduktuar përqindjen e të porsalindurve që vijnë në jetë me komplikacione të lidhura me mungesën e oksigjenit.Lexo edhe:A bën mirë të flesh më gjatë në fundjavë? Po, por me një kufi kohor Rezultatet e një projekti të rëndësishëm për riorganizimin dhe forcimin e strukturave që lidhen me repartet e maternitetit, në katër shtete të Afrikës subsahariane, tregojnë se ekziston një hapësirë e konsiderueshme për përmirësim, me qëllim uljen e vdekshmërisë neonatale të hershme në vendet në zhvillim. Përfundimet e studimit, të koordinuar nga Instituti Karolinska në Suedi, janë publikuar në revistën shkencore Nature Medicine. Projekti Edhe pse vdekjet neonatale janë ulur me 44% që nga viti 2000, në vitin 2022, viti i fundit për të cilin disponohen vlerësime zyrtare, pothuajse gjysma e të gjitha vdekjeve të fëmijëve nën 5 vjeç ndodhën menjëherë pas lindjes, pra gjatë 28 ditëve të para të jetës, periudha kur një foshnjë është më e brishtë. Afrika subsahariane mban rekordin e trishtë për përqindjen më të lartë të vdekshmërisë neonatale në botë, me 27 vdekje për çdo 1000 lindje të gjalla. Në këtë rajon, rreziku që një fëmijë të vdesë gjatë lindjes është rreth 40 herë më i lartë sesa në Evropë. Projekti ALERT (Action Leveraging Evidence to reduce perinatal Mortality and Morbidity) synon të përballet me këtë problem duke punuar mbi strukturat shëndetësore, përmes përmirësimit të trajnimit dhe mentorimit të personelit, cilësisë së shërbimeve, komunikimit dhe zgjidhjes së problemeve. “Rezultatet tona tregojnë se është e mundur të reduktohet vdekshmëria dhe sëmundshmëria neonatale duke përmirësuar cilësinë e kujdesit në maternitet, duke optimizuar praktikat e punës dhe duke forcuar ekipet e kujdesit dhe drejtimin e tyre, edhe në kushte ku burimet janë të kufizuara dhe mamitë punojnë nën presion të madh”, shpjegon Claudia Hanson, profesoreshë në Departamentin e Shëndetit Publik Global të Institutit Karolinska dhe drejtuese kryesore e studimit. Çfarë u bë Projekti përfshiu 16 reparte materniteti në Benin, Malavi, Tanzani dhe Ugandë, me një total prej 134.630 grash dhe 139.300 të porsalindurish. Studiuesit përfshinë pacientet, familjet e tyre dhe personelin shëndetësor në një proces të përbashkët planifikimi, ku u identifikuan nevojat për kujdes dhe pengesat për përmbushjen e tyre. Mbi bazën e këtyre problematikave u zhvilluan më pas programe trajnimi për personelin shëndetësor, përfshirë mamitë, programe mentorimi për drejtuesit e reparteve të maternitetit, si dhe sisteme mbështetëse për spitalet, në mënyrë që ato të përmirësonin cilësinë e shërbimeve. Në fund, u krijua edhe një regjistër dixhital perinatal, i cili u përdor gjithashtu për t’i dhënë personelit shëndetësor informacion dhe vlerësime mbi punën e kryer. Komplikacionet u identifikuan më herët Pas zbatimit të programit, probabiliteti që foshnjat të vdisnin brenda 24 orëve nga lindja u ul me 22%, ndërsa komplikacionet tek të porsalindurit të lidhura me mungesën e oksigjenit ranë me 19%. Sipas studiuesve, puna e kryer për përmirësimin e të gjithë strukturës që lidhet me kujdesin gjatë lindjes bëri të mundur identifikimin më të hershëm të komplikacioneve dhe ndërhyrjen në kohë. Gjatë studimit u përmirësua edhe monitorimi i rrahjeve të zemrës së fetusit, ndërsa përqindja e lindjeve me prerje cezariane, të planifikuara paraprakisht si masë parandaluese, u rrit lehtë. “Ne besojmë se një mbështetje më e mirë në interpretimin e shenjave të vuajtjes së fetusit gjatë lindjes mund të kontribuojë në uljen e mëtejshme të nivelit të lartë të vdekshmërisë”, përfn Hanson.
