Një ide e pazakontë po qarkullon me shpejtësi në rrjetet sociale: krijimi i një aplikacioni ku njerëzit publikojnë faturat dhe borxhet e tyre, ndërsa miliarderët mund të zgjedhin cilat prej tyre dëshirojnë të paguajnë.
Koncepti ngjan me një aplikacion takimesh, por me një ndryshim të veçantë. Në vend të profileve romantike, përdoruesit do të ngarkonin faturat dhe detyrimet financiare, ndërsa personat e pasur do të mund të rrëshqisnin djathtas për të zgjedhur ato që dëshirojnë të shlyejnë.
Ideja u publikua fillimisht më 22 tetor nga përdoruesja e X, Destiny Ndlovu, dhe mori vëmendje të madhe në platformë.
Më pas, në rrjet filloi të qarkullonte një imazh që ia atribuonte këtë propozim Elon Musk, duke krijuar përshtypjen se ishte vetë miliarderi ai që po mendonte për një aplikacion të tillë.
Por, sipas një verifikimi të publikuar nga media Lead Stories, Musk nuk e ka bërë një postim të tillë në llogarinë e tij zyrtare në X. Bëhet fjalë për një grafik të rremë që përdor emrin dhe fotografinë e tij për të përhapur idenë.
Megjithatë, koncepti ka ngjallur kuriozitet për mënyrën se si teknologjia mund të përdoret për të ndihmuar njerëzit që përballen me vështirësi financiare.