Nga Franca në Shqipëri : Pse Evropa po digjet nga fillimi në fund Rritja e çmimeve të karburanteve, pakënaqësia e nxënësve për mungesat në shkolla, përkeqësimi i shërbimeve publike dhe kriza e strehimit kanë krijuar kushtet që mijëra qytetarë të dalin në rrugë. Europa përfshihet nga vala e protestave dhe trazirave, nga Franca e Italia te Shqipëria dhe SerbiaNga protestat e dhunshme dhe plaçkitjet në Francë, Shqipëri dhe Itali, deri te demonstratat në Spanjë dhe Portugali, Europa po përballet me një valë të gjerë trazirash.
Rritja e çmimeve të karburanteve, pakënaqësia e nxënësve për mungesat në shkolla, përkeqësimi i shërbimeve publike dhe kriza e strehimit kanë krijuar kushtet që mijëra qytetarë të dalin në rrugë.
“Të rinjtë në Europë po përjetojnë një ndjenjë të fortë pasigurie dhe mungese kontrolli”, deklaroi për agjencinë e lajmeve Associated Press María Silvestre, profesoreshë e sociologjisë në Universitetin e Deustos në Spanjë.
“Dhe kur disa situata të caktuara përkojnë, papritur ndizet një shkëndijë e aftë për ta kanalizuar këtë pakënaqësi dhe për t’i nxjerrë njerëzit në rrugë”, shtoi ajo.
Qytetet janë shndërruar në fusha përplasjesh, ndërsa ekonomitë kryesore të Bashkimit Europian, si Franca, Italia dhe Spanja, po i afrohen zgjedhjeve vendimtare. Ndërkohë, partitë e ekstremit të djathtë kanë shënuar një rritje shqetësuese në Gjermani.
Në të njëjtën kohë, protestat po zhvillohen në një periudhë kur Europa ndodhet në një pikë kritike sa i përket mbështetjes për Ukrainën. Presidenti amerikan, Donald Trump, po afrohet gjithnjë e më shumë me presidentin rus, Vladimir Putin, ndërsa Rusia akuzohet për sulme hibride ndaj vendeve anëtare të NATO-s.
Francë: Nga protestat e nxënësve te plaçkitjet
Në Francë, protestat e nxënësve nisën më shumë se tri javë më parë, kur gjimnazistët bllokuan shkollat dhe organizuan demonstrata, duke kërkuar më shumë fonde për arsimin.
Nxënësit denoncojnë mungesën e mësuesve, veçanërisht në zonat me të ardhura të ulëta. Sipas tyre, në disa shkolla klasat kanë nga 40 deri në 45 nxënës.
Më pas, protestat u zgjeruan, pasi lëvizjes iu bashkuan konfederata sindikale franceze CGT dhe aktivistë të tjerë. Si rezultat, kërkesat u shtrinë edhe te rritja e kostos së jetesës dhe cilësia e shërbimeve publike.
Pavarësisht demonstratave paqësore, ku morën pjesë qindra mijëra njerëz, gjatë fundjavës shpërthyen trazira që çuan në 2,400 arrestime në zona të ndryshme të Francës. Plaçkitje u raportuan në Paris, Marsejë, Lion dhe Bordo.
Në Limoges, një zjarr përfshiu ndërtesën e bashkisë së shekullit XIX, duke shkatërruar kambanoren historike. Zjarre u regjistruan edhe në shkolla, ndërsa qindra persona mbetën të plagosur.
Presidenti francez, Emmanuel Macron, dënoi dhunën, duke akuzuar aktivistë të së majtës ekstreme se u përpoqën të mbillnin kaos përmes sulmeve ndaj ndërtesave dhe policisë.
“Ata që kanë plaçkitur duhet të paguajnë për dëmet, ndërsa ata që janë përpjekur të përmbysin Republikën do të japin llogari”, deklaroi Macron të dielën, në një fjalim të rrallë televiziv. Spanjë: Kriza e strehimit që po rëndon mbi të rinjtë
Në sheshin qendror Puerta del Sol të Madridit janë ngritur tenda prej disa javësh, në shenjë proteste kundër rritjes së qirave. Shkak për mobilizimin u bë dëbimi nga banesa i Maricarmen, një gruaje 87-vjeçare, e cila më vonë ndërroi jetë ndërsa po trajtohej në spital.
Presioni i protestave e shtyu qeverinë socialiste të miratonte masa për strehim të përballueshëm, por ato nuk siguruan mbështetjen e nevojshme parlamentare. Kjo bëri që kryeministri Pedro Sánchez të shpallte zgjedhje të parakohshme për muajin nëntor.
Gjithashtu, për nëntor është shpallur një grevë e përgjithshme, e para e këtij lloji në 14 vjet.
Paga minimale në Spanjë është 1,221 euro, ndërsa qiraja mesatare mujore për një apartament prej 80 metrash katrorë arrin rreth 1,130 euro, sipas një analize të gazetës ekonomike Expansión.
“Pjesa më e madhe e pagës sime shkon për qiranë. Bashkëjetuesja ime e ka të vështirë t’ia dalë, njësoj si unë”, deklaroi Diana Manzanares, një kameriere 20-vjeçare që ndodhet në kampin e protestuesve në Madrid.
“Ky është realiteti im dhe realiteti i shumicës prej nesh që jetojmë në këtë qytet”, shtoi ajo.
Ndërkohë, mësuesit e shkollave fillore dhe të ciklit të ulët të arsimit të mesëm nisën një grevë në Madrid javën e kaluar, duke kërkuar paga më të mira dhe kushte më të mira pune. Edhe në pjesë të tjera të Spanjës, mësuesit e pakënaqur kanë organizuar greva të ngjashme gjatë këtij viti.
Protesta të ngjashme për strehimin kanë shpërthyer edhe në qytetet më të mëdha të Portugalisë, Lisbonë dhe Porto.
Itali: Kostoja e jetesës bëhet e papërballueshme, ndërsa rritet inflacioni
Në Itali, lëvizja “Italia in Piazza” (“Italia në sheshe”) ka mobilizuar mijëra protestues, të cilët kërkojnë kushte më të mira punësimi, akses në kujdesin shëndetësor, forcimin e arsimit, masa për strehimin dhe paga më të larta.
Inflacioni në Itali u rrit në 4.2% në shtator, duke tejkaluar nivelin prej 3.8% të eurozonës, sipas të dhënave qeveritare.
Marshimet, të cilat fillimisht ishin paqësore, u shndërruan në trazira të dhunshme në Torino, Bolonja dhe Milano. Në këtë të fundit, persona të maskuar u përleshën me policinë, plaçkitën dyqane dhe u vunë flakën ndërtesave.
Policia e Milanos njoftoi se 271 persona u arrestuan, shumica prej tyre të mitur, ndërsa 14 efektivë mbetën të plagosur gjatë trazirave që zgjatën dy ditë.
Në të njëjtën kohë, një grup i sapokrijuar, që e quan veten “Lëvizja e 17 Tetorit”, njoftoi se do të nisë një “mobilizim të përhershëm”, duke organizuar protesta çdo të shtunë në orën 15:00 në qytete të ndryshme të Italisë.
Shqipëri dhe Serbi: Studentët protestojnë kundër korrupsionit
Në Tiranë, protestat kundër qeverisë kanë vijuar për më shumë se një javë, ndërsa përplasjet janë përshkallëzuar pasi gjimnazistët dhe studentët iu bashkuan lëvizjes më të gjerë “Flamingo”, e cila kërkon dorëheqjen e kryeministrit socialist Edi Rama.
Rama i ka dënuar protestuesit, duke i cilësuar si të “ideologjizuar dhe radikalizuar” nga “Antifa”, një term i përgjithshëm që përdoret për të përshkruar grupe të organizuara në mënyrë të lirshme të së majtës ekstreme në Shtetet e Bashkuara. Presidenti amerikan Donald Trump e ka cilësuar këtë lëvizje si organizatë terroriste.
Lufta kundër korrupsionit dhe çrrënjosja e tij janë ndër kërkesat kryesore të lëvizjes “Flamingo”. Emri i saj lidhet me habitatin natyror të flamingove në një zonë ku qeveria Rama ka rënë dakord të lejojë realizimin e një investimi të madh turistik luksoz, të lidhur me Jared Kushner, dhëndrin e presidentit amerikan Donald Trump.
Në Serbi, studentët që prej gati dy vitesh janë në krye të protestave masive kundër korrupsionit po kundërshtojnë përpjekjen e ish-liderit populist Aleksandar Vuçiç për t’u rikthyer në pushtet.
Vuçiç synon të bëhet kryeministër pas zgjedhjeve parlamentare të 25 tetorit. Partia “Lista e Studentëve”, e mbështetur nga të rinjtë, raportohet se është pranë një përballjeje elektorale me partinë e Vuçiçit. Kjo e bën rezultatin të pasigurt dhe shton frikën për shpërthimin e mundshëm të dhunës./ Associated Press protestat e te rinjve ne evrope Lini një Përgjigje Anuloje përgjigjen Rajoni dhe Bota Trump kërkon takim historik me Putin dhe Xi Jinping në Kinë, në fokus të samitit çarmatimi bërthamor 20 Tetor 2026, 11:2611:26Rajoni dhe Bota Klithma e të rinjve evropianë: Nëse na rrëmbeni të ardhmen, ne do t’ju bllokojmë të tashmen! 20 Tetor 2026, 11:0111:01Rajoni dhe Bota Trump kritikon Ukrainën: Nuk po jep asgjë në këmbim të mbështetjes amerikane 20 Tetor 2026, 10:2310:23Rajoni dhe Bota Alarm për bomba në shkollat italiane, evakuohen rreth 50 godina 20 Tetor 2026, 10:0410:04Rajoni dhe Bota Vance distancohet nga qëndrimi i Trump, nuk e mbështet Netanyahun në zgjedhje 20 Tetor 2026, 08:0408:04Rajoni dhe Bota Rrëmbehet bosi i drogës, ekzekutohet partnerja e tij (Video) 19 Tetor 2026, 22:5022:50Rajoni dhe Bota