Transporti publik pritet të nisë shtatorin me një reduktim të ndjeshëm të mjeteve në qarkullim. Operatorët kanë paralajmëruar se, duke nisur nga 1 shtatori, numri i autobusëve do të ulet me rreth 20 deri në 30 për qind, në varësi të mundësive financiare dhe operative të secilës kompani.
Vendimi vjen në një kohë kur operatorët thonë se kostot e shërbimit janë rritur ndjeshëm dhe se mbajtja e të gjithë flotës në punë është bërë e papërballueshme. Në qendër të shqetësimit është kostoja e karburantit, e cila sipas tyre përbën një nga shpenzimet kryesore të aktivitetit.
Operatorët sqarojnë se reduktimi i flotës nuk është një zgjedhje e tyre, por pasojë e drejtpërdrejtë e pamundësisë për të përballuar financiarisht funksionimin me kapacitet të plotë.
Masa pritet të ndihet menjëherë nga qytetarët. Ulja e numrit të autobusëve do të sjellë intervale më të gjata mes mjeteve, pritje më të mëdha në stacione dhe rritje të mbingarkesës në autobusët që do të vijojnë të operojnë.
Përballë kësaj situate, operatorët i janë drejtuar institucioneve përgjegjëse me kërkesën për ndërhyrje urgjente. Ata kërkojnë konkretizimin e mbështetjes financiare dhe realizimin e kompensimit për kostot e karburantit, duke paralajmëruar se pa një zgjidhje të shpejtë shërbimi rrezikon të përkeqësohet më tej.
Operatorët thonë se kanë vijuar përpjekjet për të garantuar shërbimin, por theksojnë se në kushtet aktuale funksionimi me 100% të flotës nuk është më i përballueshëm.
Ata kërkojnë që situata të trajtohet me prioritet, me synim rikthimin sa më shpejt të kapacitetit të plotë të transportit publik dhe shmangien e një tjetër goditjeje për qytetarët që e përdorin atë çdo ditë.