Foto ilustruese Brent u ngjit në 90,87 dollarë për fuçi, ndërsa WTI në 84,50 dollarë. Skadimi i marrëveshjes 60-ditore mes Uashingtonit dhe Teheranit, rënia drastike e trafikut në Ngushticën e Hormuzit dhe ashpërsimi i retorikës nga të dyja palët po shtojnë shqetësimet për furnizimin global me energji Çmimet e naftës u rritën me më shumë se 2,5% të hënën, ndërsa ngërçi mes Shteteve të Bashkuara dhe Iranit, kërcënimet e reja të Teheranit për përshkallëzim në Ngushticën e Hormuzit dhe deklaratat e ashpra të presidentit amerikan Donald Trump shtuan shqetësimet për furnizimin global.
Kontratat e së ardhmes për Brent u rritën me 2,35 dollarë, ose 2,65%, duke u mbyllur në 90,87 dollarë për fuçi. Nafta amerikane West Texas Intermediate (WTI) fitoi 2,10 dollarë, ose 2,55%, duke arritur në 84,50 dollarë për fuçi.
Në qendër të vëmendjes është e ardhmja e negociatave mes Uashingtonit dhe Teheranit, pasi të hënën përfi afati 60-ditor i përcaktuar në memorandumin e mirëkuptimit të 17 qershorit. Marrëveshja parashikonte hapjen e Ngushticës së Hormuzit, ndërsa dy palët do të negocionin një marrëveshje përfundimtare edhe për programin bërthamor iranian.
Megjithatë, perspektiva për një zgjidhje diplomatike duket gjithnjë e më e kufizuar. Zëdhënësi i Ministrisë së Jashtme iraniane, Esmaeil Baghaei, përjashtoi bisedimet për zgjatjen e memorandumit, sipas agjencisë shtetërore Tasnim.
“Ne as nuk i nisëm negociatat dhe SHBA-ja e shkeli marrëveshjen që në fillim. Prandaj çështja e 60 ditëve nuk ka rëndësi”, deklaroi Baghaei.
Edhe Trump tha se Shtetet e Bashkuara nuk kërkojnë zgjatjen e memorandumit. Presidenti amerikan u tha gazetarëve se Teherani nuk do ta pranonte llojin e marrëveshjes që ai e konsideron të nevojshme.
Tensionet u shtuan më tej pas deklaratave të një zyrtari të lartë iranian për Reuters, sipas të cilit Teherani është i gatshëm të ndryshojë strategjinë dhe të kalojë “nga mbrojtja në sulm” nëse diplomacia me Uashingtonin dështon. Sipas tij, Irani mund të përshkallëzojë situatën në Hormuz dhe në rajonin më të gjerë nëse SHBA-ja nuk zbaton plotësisht marrëveshjen e ndërmjetme brenda disa javësh.
“Subjektet iraniane duhet të jenë të përgatitura për të përshkallëzuar tensionet në Ngushticën e Hormuzit dhe në rajonin më të gjerë, pasi Irani do të jetë i gatshëm të marrë vendime dhe të veprojë përballë zgjedhjeve të vështira”, tha zyrtari për Reuters.
Ai shtoi se Teherani po humbet besimin te vlera e diplomacisë me Uashingtonin.
Nga ana tjetër, Trump ashpërsoi ndjeshëm gjuhën ndaj Iranit. “Irani duhet të ngrejë flamurin e bardhë të dorëzimit”, deklaroi ai në një intervistë telefonike për Fox News.
Presidenti amerikan kërcënoi gjithashtu Omanin, i cili ka luajtur rol ndërmjetësues në përpjekjet për menaxhimin e trafikut përmes Hormuzit. “Nëse Omani futet në mes, do ta bombardojmë pa mëshirë”, tha Trump.
Zhvillimet kanë rëndësi të veçantë për tregun global të energjisë për shkak të tkurrjes së fortë të trafikut detar në Hormuz. Përpara fillimit të sulmeve amerikano-izraelite ndaj Iranit në fund të shkurtit, përmes kësaj ngushtice kalonte rreth një e pesta e furnizimeve botërore me naftë dhe gaz natyror të lëngshëm (LNG).
Sipas të dhënave të Kpler, të cituara nga Reuters, vetëm pesë anije mallrash kaluan ngushticën të shtunën, ndërsa të dielën nuk u regjistrua asnjë kalim i tillë. Një fundjavë më parë kishin kaluar 31 anije. Të dhëna të tjera të Kpler, të cituara nga CNBC dhe që përfshijnë trafikun në tërësi, tregojnë vetëm tre anije që kaluan të dielën, duke sinjalizuar se lëvizja tregtare është afër paralizës.
“Sa më shumë ngrihen tonet, aq më shumë rriten çmimet”, tha Phil Flynn, analist i lartë në Price Futures Group, duke theksuar se pasiguria mbi aftësinë e anijeve për të kaluar përmes Hormuzit po ushqen shqetësimin në treg.
Të dyja kontratat kryesore të naftës ishin rritur tashmë me më shumë se 5% gjatë javës së kaluar, pas sulmeve ndaj cisternave të menaxhuara nga ADNOC në Hormuz dhe ndaj një rafinerie të Saudi Aramco.
Tregu ndodhet tani përballë dy skenarëve shumë të ndryshëm. Një zgjidhje diplomatike që do të mundësonte rikthimin e plotë të trafikut në Hormuz mund të sillte një ulje të shpejtë të çmimeve. Në të kundërt, një ndërprerje më e thellë e flukseve të naftës mund ta çojë Brent-in në nivele dukshëm më të larta.
Bjarne Schieldrop i SEB Research vlerëson se çmimet vështirë se do të rriten shumë më tepër, përveç rastit kur ndërpriten edhe flukset aktuale të naftës gjatë natës përmes Hormuzit ose mbyllet Ngushtica Bab el-Mandeb.
Ndërsa presidenti i Rapidan Energy, Bob McNally, vlerëson se Brent mund t'i afrohet përsëri pragut të 100 dollarëve për fuçi. Sipas tij, një faktor tjetër vendimtar është Kina.
McNally thotë se Pekini ka reduktuar importet me 4 deri në 5 milionë fuçi në ditë, duke ndihmuar në frenimin e një rritjeje edhe më të madhe të çmimeve ndërkombëtare gjatë luftës me Iranin. Situata mund të ndryshojë nëse Kina lejon rafineritë e saj të rrisin sërish importet për të përfituar nga çmimet e larta të produkteve të rafinuara.
“Dalja e Kinës nga kjo ulje drastike e importeve nuk është e pajtueshme me çmime të qëndrueshme të Brent-it”, paralajmëroi McNally.
Ndërkohë, sekretari amerikan i Energjisë, Chris Wright, tha se Trump ka kohë të presë derisa sanksionet dhe embargoja ndaj naftës të ushtrojnë presion edhe më të madh mbi Teheranin.
“Mendoj se po. Presidenti po luan lojën afatgjatë”, deklaroi Wright për Fox News.
“Irani aktualisht nuk mund të eksportojë fare naftë. Kjo është pjesë e mbytjes ekonomike që po i imponojmë. Por bota nuk ka nevojë për naftën iraniane”, shtoi ai.
Në të njëjtën kohë, prodhuesit e Gjirit po kërkojnë rrugë alternative për të ruajtur eksportet. ADNOC ka shitur të paktën 14 milionë fuçi naftë në tregun spot për rafineritë aziatike, ndërsa Saudi Aramco po u ofron disa klientëve aziatikë ngarkesa që mund të dorëzohen jashtë Ngushticës së Hormuzit.
Për momentin, tregu po reagon kryesisht ndaj rrezikut të një përshkallëzimi të ri. Me negociatat SHBA-Iran në ngërç dhe trafikun në një nga arteriet më të rëndësishme energjetike të botës të reduktuar ndjeshëm, pragu prej 100 dollarësh për fuçi është rikthyer si një skenar i mundshëm për Brent-in nëse furnizimet pësojnë ndërprerje të mëtejshme.nafta lufta Lini një Përgjigje Anuloje përgjigjen Rajoni dhe Bota Pse Kina zgjodhi Marokun si qendrën e saj mesdhetare? 17 Gusht 2026, 21:3221:32Rajoni dhe Bota Video/ Publikohen pamjet e aksidentit tragjik në Greqi, momenti kur helikopteri bie në tokë 17 Gusht 2026, 21:1821:18Rajoni dhe Bota Nga Erdogan te Mamdani, Netanyahu liston kundërshtarët: Mos i lini të fitojnë 17 Gusht 2026, 20:3520:35Rajoni dhe Bota Izraeli dhe Bordi i Paqes krijojnë grupe pune, por sfidat mbeten 17 Gusht 2026, 19:4819:48Rajoni dhe Bota "Ishte zgjedhja ime”, biznesmeni italian merr përsipër atentatin ndaj Sigfrido Ranuccit 17 Gusht 2026, 19:3819:38Rajoni dhe Bota Detaje nga rrëzimi i helikopterit në Greqi, çifti britanik po shkonte për muajin e mjaltit! 17 Gusht 2026, 18:5518:55Rajoni dhe Bota