Një dokumentar i ri investigativ i BBC-së ka sjellë dëshmi tronditëse nga gra që pretendojnë se janë abuzuar seksualisht nga Jeffrey Epstein, duke zbuluar gjithashtu mënyrën se si financieri përdorte industrinë e modelingut për të afruar vajza të reja në rrjetin e tij.
Në dokumentarin “The Model Trap: Exposing Jeffrey Epstein’s Network”, publikuar më 10 nëntor 2026, BBC Eye Investigations shqyrton lidhjet mes agjencive të modelingut, ndërmjetësve dhe njerëzve të fuqishëm që, sipas investigimit, i krijuan Epstein mundësi për të pasur kontakt me vajza dhe gra të reja, edhe pas dënimit të tij për vepra seksuale.
Një nga dëshmitë më të rënda vjen nga një modele nga Europa Lindore, e identifikuar me pseudonimin Simona për të mbrojtur identitetin e saj. Ajo tregoi për BBC-në se ishte vetëm 20 vjeçe kur u njoh me Epstein dhe se ai e kishte përdhunuar më shumë se 200 herë gjatë periudhës gati dyvjeçare që e mbajti nën kontroll.
“Disa njerëz mendojnë se ne përfituam diçka, se pranuam këtë abuzim për para apo ndikim, por kjo nuk është e vërtetë. Ne kemi mbetur me trauma të thella”, rrëfeu ajo.
Sipas dëshmisë së Simonës, Epstein e prezantoi me Faith Kates, e cila në atë kohë drejtonte agjencinë e njohur të modelingut Next Management. Gjatë takimit, Kates dyshohet se i sugjeroi modeles të kryente ndërhyrje estetike dhe i dërgoi Epstein-it të dhënat e një kirurgu.
Më pas, sipas Simonës, Epstein e bindi të hiqte dorë nga modelingut dhe e përfshiu në punën si asistente e tij, duke ushtruar kontroll mbi jetën e saj.
Avokatët e Faith Kates i thanë BBC-së se klientja e tyre ishte manipuluar nga Epstein dhe mohuan se ajo i kishte kërkuar ndonjë modeleje të kryente ndërhyrje kirurgjikale.
Një tjetër dëshmi vjen nga Roza Gilles, një modele nga Uzbekistani, e cila tregoi se ishte vetëm 18 vjeçe kur agjencia MC2 Model Management e dërgoi në shtëpinë e Epstein në Palm Beach të Floridës, për dy sesione fotografike në vitin 2009.
Në atë periudhë, Epstein po vuante një dënim për vepra seksuale ndaj një të miture, por kishte leje të punonte gjatë ditës nga banesa e tij. Roza pretendon se më pas u punësua si asistente e tij dhe u abuzua seksualisht për tre vite.
“Agjencia ime duhej të më mbronte, por dështoi. Përkundrazi, më vuri në rrezik dhe për këtë duhet të mbajë përgjegjësi”, deklaroi ajo për BBC-në.
Investigimi zbulon gjithashtu se Epstein i kishte dhënë një milion dollarë agjencisë MC2 në vitin 2005. Dokumentet e shqyrtuara nga BBC tregojnë se dhjetë modele të lidhura me këtë agjenci kishin pasur takime ose komunikime me të edhe pas dënimit të tij.
BBC Eye analizoi më shumë se tre milionë faqe dokumentesh të publikuara nga Departamenti amerikan i Drejtësisë dhe intervistoi mbi 100 modele nga 14 vende, për të rindërtuar mënyrën se si funksiononte rrjeti ndërkombëtar i rekrutimit.
Sipas investigimit, ndërmjetësit dhe agjentët e modelingut luanin një rol të rëndësishëm në identifikimin dhe afrimin e vajzave të reja. Avokatja Sigrid McCawley, e cila përfaqëson më shumë se 100 viktima të Epstein, e përshkroi këtë mekanizëm si një sistem të sofistikuar, ku rekrutimi i vajzave ishte pjesë thelbësore e abuzimeve.
Personat e përmendur në investigim kanë mohuar dijeninë ose përfshirjen në abuzimet e pretenduara. Avokatët e Faith Kates deklaruan se ajo ishte mashtruar nga Epstein, ndërsa ish-agjenti Ramsey Elkholy mohoi se kishte ditur apo lehtësuar ndonjë abuzim.
Jeffrey Epstein u gjet i vdekur në një burg në New York në gusht të vitit 2019, ndërsa priste gjykimin për akuzat federale të trafikimit seksual.
Dokumentari i BBC-së rikthen vëmendjen te një prej skandaleve më të mëdha të abuzimit seksual në SHBA, duke ngritur pikëpyetje edhe për përgjegjësinë e personave dhe institucioneve që mundësuan afrimin e viktimave me financierin.

