Kreu i Partisë Demokratike, Sali Berisha, ka deklaruar se gjatë vizitës së tij në Shtetet e Bashkuara ka gjetur mbështetje për luftën kundër asaj që ai e cilëson si “narkoshtet” dhe trafikut të drogës. Berisha tha se gjatë takimeve me partnerët amerikanë, delegacioni i opozitës e kishte vendosur në qendër të diskutimeve problematikën e narkotikëve dhe ndikimin e tyre në Shqipëri. Ai pretendoi se paratë e trafikut të drogës që hyjnë në Shqipëri kanë ndikuar në zhvlerësimin e monedhës vendase kundrejt euros dhe dollarit. Berisha përmendi shifra për euron dhe dollarin, duke ia atribuar këtë dukuri fluksit të parave të paligjshme. Sipas tij, çështja e luftës kundër narkoshtetit dhe trafiqeve ka gjetur “mbështetje të plotë” nga pala amerikane. Dalila Myrtaj: Ju thatë se pas kthimit, ju thatë pas kthimit se një nga objektivat ishte të kërkonit mbështetjen amerikane dhe të diasporës për ndryshimin e sistemit politik në Shqipëri. A morët ndonjë angazhim konkret nga partnerët amerikanë? Sali Berisha: Dalila, faleminderit për pyetjen. E theksoj që në të gjitha bisedimet tona me partnerët amerikanë, ne shtruam problem kryesor, problemin e narkoshtetit.
Shtruam një problem që po e shkatërron Shqipërinë.
Sot narkoeurot dhe narkodollarët që futen me kontejnerë nga deti, toka dhe ajri në Shqipëri kanë zhvlerësuar dy monedhat më të mëdha të planetit, më shumë se në çdo narkoshtet tjetër të botës. 32% euro, sot euro ka zbritur në 91 lekë dhe 35% dollari. Sigurisht që lufta kundër narkoshtetit dhe trafiqeve gjeti mbështetje të plotë, dhe Shtetet e Bashkuara mbeten të angazhuara.
Vetë sekretari Rubio, në mesazhin që dërgon për Ditën e Pavarësisë shprehet se kartelet e drogës dhe bashkëpunëtorët e tyre, janë një rrezik serioz për sigurinë e qytetarëve të Shteteve të Bashkuara.
Pra, unë mendoj se zëri ynë u dëgjua.
Them dhe njëherë, nuk ishte një rrufe në qiell të hapur që po e dëgjonin për herë të parë, jo.
Kështu që kam besim se Shtetet e Bashkuara do të ndihmojnë edhe më shumë, do të angazhohen dhe më shumë në këtë aspekt. © BalkanWeb Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb Etiketa: Berisha