Fredi Beleri Fredi Beleri veçoi publikisht si meritë faktin se Ilias Kasidiaris, ish-deputeti i Agimit të Artë, e kishte kryer dënimin “deri në ditën e fundit”. Deklarata shkaktoi reagimin e PASOK-ut dhe kërkesën që qeveria Mitsotakis të distancohej… Fredi Beleri bëri një deklaratë për Ilias Kasidiarisin, duke shkaktuar reagime në Greqi, dhe më pas u zbyth duke tërhequr pikërisht fjalinë që kishte ndezur debatin.
Eurodeputeti i Demokracisë së Re foli për Kasidiarisin në një intervistë të dhënë më 10 shtator në televizionin ONE. Kur u pyet për ish-deputetin e Agimit të Artë, Beleri tha se nuk e njihte dhe se nuk kishte bashkëpunuar me të, por më pas bëri deklaratën që e futi në përplasje politike.
“E di se është një nga të paktët grekë që e kreu burgun deri në ditën e fundit”, tha Beleri për Kasidiarisin.
PASOK-u e interpretoi atë si lartësim të Kasidiarisit dhe kërkoi që zëdhënësi i qeverisë të distancohej publikisht nga eurodeputeti i Demokracisë së Re. Në deklaratën e tij, PASOK-u e cilësoi Kasidiarisin si të dënuar dhe mbështetës të nazizmit dhe e vendosi deklaratën e Belerit në kontekstin e debatit për rikthimin e tij në politikë.
Beleri fillimisht kishte shkuar edhe më tej. Pasi foli për vuajtjen e dënimit, ai tha se Kushtetuta dhe demokracia duhet të zbatohen për të gjithë, përfshirë Kasidiarisin, dhe shtoi: “Nuk kam frikë prej tij”. Por kur deklarata mori përmasa politike, Beleri ndryshoi kurs.
Më 19 shtator, ai doli me një postim publik dhe tërhoqi pikërisht fjalinë që kishte shkaktuar reagimet. “Një shprehje e imja në një pjesë të intervistës në One ishte e pavend dhe e tërheq”, deklaroi Beleri. Pra, nuk kemi vetëm një debat mbi interpretimin e fjalëve të tij. Vetë Beleri pranoi se formulimi ishte i pavend dhe e tërhoqi.
Por eurodeputeti tentoi njëkohësisht të zhvendoste një pjesë të përgjegjësisë te PASOK-u. Ai akuzoi partinë opozitare se kishte shkëputur fjalinë nga pjesa tjetër e intervistës dhe se kishte krijuar një imazh që, sipas tij, nuk përputhet me qëndrimet që ka mbajtur ndër vite.
Beleri deklaroi gjithashtu se nuk ka “asnjë lidhje me zotin Kasidiaris dhe atë që ai përfaqëson”. Ai e paraqiti qëndrimin e tij si respekt ndaj demokracisë, institucioneve dhe shtetit të së drejtës.
Për të mbrojtur pozicionin e tij, Beleri solli më pas edhe Demokracinë e Re. Ai tha se ndihet krenar që i përket forcës politike gjatë qeverisjes së së cilës u mblodhën dosjet për Agimin e Artë, ato iu dorëzuan drejtësisë dhe ndryshoi kuadri ligjor për organizatat kriminale.
Por ky argument nuk ndryshon kronologjinë e episodit.
Më 10 shtator, Beleri veçoi publikisht si element pozitiv faktin se Kasidiaris kishte qëndruar në burg “deri në ditën e fundit”. PASOK-u reagoi dhe kërkoi distancimin e qeverisë. Më 19 shtator, Beleri e quajti deklaratën e vet “të pavend” dhe e tërhoqi. PASOK-u e zgjeroi ndërkohë çështjen edhe te Demokracia e Re. Duke iu referuar informacioneve mediatike, partia kërkoi shpjegime për një takim të drejtorit të zyrës së kryeministrit në Parlament, Michalis Bekiris, me Giannis Kourgianidis, të cilin PASOK-u e identifikoi si drejtues të Frontit Kombëtar dhe bashkëbisedues të Kasidiarisit. Partia kërkoi të dinte edhe nëse Kyriakos Mitsotakis kishte dijeni për takimin.
Kështu, Beleri hyri në debat duke folur për Kasidiarisin si një njeri që e kishte kryer dënimin deri në fund, ndërsa doli prej tij duke deklaruar se fjalia e vet ishte e pavend.
Tërheqja nuk e fshin deklaratën fillestare. Ajo vetëm dokumenton se, pas reagimit politik që shkaktoi, vetë Beleri vendosi të mos e mbronte më formulimin që kishte përdorur. /Pamfleti/ fredi beleri pasok agimi i arte Lini një Përgjigje Anuloje përgjigjen Politike Berisha entuziast nga vizita në SHBA: Trump goditi komunizmin dhe kartelet, dy shtyllat e regjimit të Ramës 19 Shtator 2026, 12:2812:28Politike “S’janë sardele”, Zhupa denoncon kushtet në kopshtet dhe çerdhet e Sarandës: 70 fëmijë në një klasë, te merren urgjent masa! 19 Shtator 2026, 11:2511:25Politike Ambasadori i ri amerikan mbërrin në Tiranë; misteri i pritjes së 2 tetorit: A është Berisha në listë? 19 Shtator 2026, 10:5610:56Politike “90% e pagës ikën për bukë e qira”, Tabaku: Rritja ekonomike e qeverisë nuk mbërrin te familjet 19 Shtator 2026, 10:3210:32Politike Tirana e Prishtina në agjendën e Von Der Leyn, anashkalohet Beogradi 19 Shtator 2026, 10:0510:05Politike Braçe kundër mënyrës si po bëhet Reforma Territoriale: Kufijtë i mora vesh nga media, deputetët nuk janë informuar 18 Shtator 2026, 22:5122:51Politike