Dasma e Lucas Hernández me Victoria Triay është kthyer në një festë të paharrueshme edhe për yjet e futbollit francez, me Kylian Mbappé që ka dhuruar një nga momentet më pikante të mbrëmjes.
Në pamjet që po qarkullojnë me shpejtësi në rrjetet sociale, sulmuesi i Real Madridit shfaqet me një kapele kauboji, duke u ngjitur mbi qafën e mikut dhe ish-shokut të tij të skuadrës, Lucas Hernández, duke e përdorur atë si një “kalë” teksa festa kishte marrë një tjetër ritëm.
Por Mbappé nuk ishte i vetmi që tërhoqi vëmendjen.
Në një tjetër moment të festës, Achraf Hakimi u shfaq pas pultit si DJ, duke mbajtur muzikën dhe atmosferën në maksimum, ndërsa Ousmane Dembélé mori rolin e këngëtarit dhe iu bashkua festës me mikrofon në dorë.
Pamjet tregojnë një atmosferë tepër të çlirët mes futbollistëve, larg presionit të fushës dhe angazhimeve sportive. Mbappé, Hakimi dhe Dembélé duket se kanë shfrytëzuar në maksimum mbrëmjen për të festuar me Hernándezin në ditën e tij të veçantë.
Nga kostumet elegante te kapelet e kaubojit, nga fusha e futbollit te mikrofoni dhe pulti i DJ-it – yjet francezë e kthyen dasmën e Hernández në një spektakël më vete.
Videoja e Mbappé me kapele, duke “kalëruar” Hernándezin, është tashmë ndër momentet më të shpërndara nga festa.