Përdorimi i ChatGPT për këshilla shëndetësore po ndikon gjithnjë e më shumë te pacientët në Shqipëri, me mjekë që raportojnë raste të vetëdiagnostikimit dhe analizave të kryera pa rekomandim. Një rast i tillë është ai i një studenteje mjekësie në Gjermani, e cila këmbëngulte se vuante nga çrregullimi obsesivo-kompulsiv (OCD), por pas tre seancash dhe testeve të specializuara, psikologia Sonila Jaupbashi konstatoi se diagnoza nuk qëndronte. Sipas saj, pacientja pranoi se ishte “diagnostikuar” nga ChatGPT.
Mjekë të specialiteteve të ndryshme i thanë BIRN se një pjesë e madhe e pacientëve konsultojnë simptomat me Inteligjencën Artificiale përpara se të shkojnë te mjeku. Sipas tyre, kjo sjellje ka çuar në raste të analizave të panevojshme dhe shpenzimeve të konsiderueshme, ndërsa disa pacientë mbërrijnë në konsultë me bindje të krijuara nga përgjigjet e chatbot-it. Megjithatë, ka edhe mjekë që e shohin IA-në si një mjet ndihmës, duke theksuar se ajo mund të ofrojë informacion, por nuk zëvendëson vlerësimin profesional.
Ekspertët kërkojnë më shumë kujdes në përdorimin e Inteligjencës Artificiale për çështjet shëndetësore dhe një kuadër më të qartë rregullator në Shqipëri. Ata sugjerojnë që analiza të caktuara dhe veçanërisht marrja e medikamenteve të bëhen vetëm me rekomandim mjekësor, për të shmangur vetëdiagnostikimin dhe trajtimet e gabuara. Ndërkohë, projektligji shqiptar për Inteligjencën Artificiale është ende në fazë konsultimi.