Një valë alarmesh për bomba ka përfshirë fluturimet në disa vende të Europës këtë të enjte, 5 nëntor. Avionë pasagjerësh janë detyruar të bëjnë ulje emergjente, ndërsa forcat ajrore të Francës, Italisë dhe Bullgarisë janë vënë në lëvizje. Kërcënimet për dy fluturime drejt Romës kanë ardhur përmes një emaili të shkruar në italisht, ku paralajmërohej se avionët do të shpërthenin brenda 60 minutash. Ende nuk dihet kush qëndron pas kërcënimeve dhe nëse incidentet kanë lidhje me njëri-tjetrin. Kjo valë alarmesh vjen në një kohë kur në Europë po rritet shqetësimi për të ashtuquajturat operacione hibride, që përfshijnë sabotime, sulme kibernetike dhe veprime të tjera që synojnë të shkaktojnë ndërprerje dhe destabilizim. Mes rasteve të përmendura janë edhe sulmet ndaj sistemeve të ftohjes të rrjeteve të mëdha të shpërndarjes në Europë. LEXO edhe...Alarm për bomba në katër avionë në Evropë, ulje emergjente në disa vende Sipas ekspertëve, shpeshtësia e këtyre incidenteve ngre dyshime për një veprim të koordinuar nga një grup. Vetëm në katër ditët e para të nëntorit janë regjistruar më shumë se një duzinë alarmesh të rreme, ndërkohë që mesatarja historike është rreth dy raste në muaj. Ulje emergjente në Francë për avionin Dublin-Romë, emaili kërcënues: Duam t'ju asgjësojmë Alarmet për bomba në fluturimet Helsinki-Romë dhe Dublin-Romë janë shkaktuar nga një email i vetëm, i nënshkruar nga një grup që e quan veten “Luftëtarët e Shtetit Mashkullor”. Sipas burimeve hetimore, mesazhi ishte shkruar në italisht, me subjektin “Njoftim kërcënimi”, dhe kishte mbërritur në orët e para të mëngjesit në adresat elektronike të kompanisë që administron aeroportet e Romës, si dhe të disa kompanive të tjera që operojnë në aeroportin e kryeqytetit italian. “Ju jeni të gjithë bashkëpunëtorë në një komplot kriminal. Duam t'ju asgjësojmë për këtë arsye. Pikërisht për këtë, në këtë moment, në fluturimet e mëposhtme janë vendosur mjete shpërthyese: AY1761, Helsinki-Itali, EI402, Dublin-Itali. Ata po drejtohen drejt aeroportit tuaj. Ne, luftëtarët e Shtetit Mashkullor, me veprimet tona të sotme do të lëmë gjurmë në histori. Regjimi juaj feminist do ta mbajë mend përgjithmonë. Shpërthimi do të ndodhë pas 60 minutash. Sot qielli juaj do të jetë i kuq”, thuhej në mesazhin kërcënues. Edhe gjatë ditëve të mëparshme, email-e të shkruara në italisht kishin paralajmëruar për praninë e bombave në dy fluturime të kompanisë Ryanair që mbërrinin në Romë. Pas kërcënimit të së enjtes, fluturimi Dublin-Romë i kompanisë Aer Lingus u devijua drejt aeroportit ushtarak Évreux-Fauville, në Normandi të Francës. Avioni Airbus A320 ishte nisur nga Irlanda dhe pritej të mbërrinte në kryeqytetin italian rreth orës 10:30. Kur ndodhej mbi zonën e Essonne, në jug të Parisit, avioni ndryshoi drejtim dhe u kthye pas. Ai kreu disa rrotullime në ajër, përpara se të merrte drejtimin drejt veriut dhe më pas të kthehej sërish drejt jugut, në drejtim të bazës ajrore në Normandi. Avioni kreu ulje emergjente, i shoqëruar nga një avion luftarak Rafale i Forcave Ajrore franceze. Në bord ndodheshin 151 pasagjerë dhe gjashtë anëtarë të ekuipazhit, të cilët u evakuuan përpara ndërhyrjes së ekipeve të specializuara për kontrollin e mjeteve shpërthyese. “Pamë avionët luftarakë pranë nesh”, dëshmia e pasagjerit: Na thanë se kishte probleme teknike Nicola Timpone, drejtor i përgjithshëm i organizatës GAL “La Cittadella”, i cili ndodhej në avionin Dublin-Romë, ka treguar për agjencinë italiane të lajmeve ANSA momentet e tensionit gjatë fluturimit. “Na komunikuan se avioni, për shkak të problemeve teknike, duhej të ulej në një aeroport francez. Në një moment pamë avionë luftarakë pranë avionit tonë. Pikërisht atëherë filluam të mendonim se diçka nuk po shkonte siç duhej”, ka treguar ai. Timpone, i cili është edhe një nga organizatorët e Festivalit Marateale, tha se prania e avionëve ushtarakë i bëri pasagjerët të dyshonin se bëhej fjalë për një alarm për bombë. “Në atë moment e kuptuam se mund të kishte një alarm për bombë. Në fund u ulëm dhe e gjetëm veten në një aeroport ushtarak, të rrethuar nga zjarrfikës, policë dhe shumë ambulanca. Na vendosën në një pistë dytësore, na kërkuan të ndalonim dhe jemi ende në avion, duke pritur të kuptojmë se çfarë po ndodh”, tregoi ai për ANSA-n, ndërsa priste informacion mbi situatën. Alarm edhe në fluturimet Helsinki-Romë dhe Helsinki-Vjenë, kontrollet nuk zbulojnë bomba Një tjetër alarm për bombë u regjistrua në fluturimin e kompanisë Finnair nga Helsinki drejt Romës. Avioni mbërriti normalisht në aeroportin Fiumicino në orën 09:30 të mëngjesit të së enjtes. Pas kërcënimit anonim ishin aktivizuar edhe avionët luftarakë të Forcave Ajrore italiane. Ekspertët e policisë përfunduan kontrollet në avion, ndërsa alarmi rezultoi i pabazë. Kompania finlandeze konfirmoi se edhe një fluturim tjetër, nga Helsinki drejt Vjenës, ishte përballur me një kërcënim të ngjashëm. “Mund të konfirmoj se sot, më 5 nëntor, fluturimi AY1761 nga Helsinki në Romë, me 144 pasagjerë dhe shtatë anëtarë të ekuipazhit, si dhe fluturimi AY1471 nga Helsinki në Vjenë, me 177 pasagjerë dhe gjashtë anëtarë të ekuipazhit, morën njoftime për bomba, të cilat më pas rezultuan të pabaza”, deklaroi për televizionin finlandez Yle, Stiina Tuunanen, përgjegjëse e komunikimit në Finnair. Kompania sqaroi se të dy avionët u ulën të sigurt në destinacionet përkatëse dhe se pasagjerët zbritën normalisht. Finnair theksoi gjithashtu se ka një procedurë të qartë për shqyrtimin e çdo kërcënimi të raportuar. Avioni Milano-Varshavë detyrohet të ulet në Vjenë, alarme edhe për fluturime të tjera në Malpensa Një avion Airbus A321 i kompanisë Wizz Air, i nisur nga aeroporti Malpensa i Milanos në orën 07:00 drejt Varshavës, u detyrua të kryente ulje emergjente në Vjenë të Austrisë. Kompania konfirmoi se vendimi u mor pasi gjatë fluturimit ishte marrë një kërcënim për bombë. “Wizz Air konfirmon se fluturimi i sotëm Milano Malpensa-Varshavë (W4 6387) është devijuar drejt Vjenës pas një kërcënimi për bombë të marrë gjatë fluturimit. Devijimi u vendos në përputhje me protokollet dhe procedurat e parashikuara të sigurisë, duke vendosur në plan të parë mbrojtjen e pasagjerëve dhe ekuipazhit”, thuhet në njoftimin e kompanisë. Wizz Air shtoi se po bashkëpunon plotësisht me autoritetet përkatëse dhe po merr të gjitha masat e nevojshme për të garantuar sigurinë e personave në bord. “Siguria dhe mbrojtja e pasagjerëve dhe anëtarëve të ekuipazhit vazhdojnë të jenë përparësia jonë absolute”, theksoi kompania ajrore. Një tjetër alarm për bombë u raportua nga shërbimet rumune të inteligjencës për një fluturim të Wizz Air, i nisur gjithashtu nga Milano Malpensa dhe që u ul i sigurt në Bukuresht. Në këtë avion ndodheshin 182 pasagjerë dhe shtatë anëtarë të ekuipazhit, të cilët u zbritën nga avioni. Dy kërcënime të tjera u regjistruan në avionë që po mbërrinin në aeroportin Malpensa gjatë paradites. Rasti i parë përfshinte një fluturim të kompanisë Aegean Airlines, të nisur nga Selaniku, ndërsa i dyti një avion të Ryanair, që ishte nisur nga Porto. Të dy avionët u ulën në aeroportin italian mes orës 09:30 dhe 10:30. Menjëherë pas mbërritjes, policia aktivizoi procedurat e kontrollit të sigurisë për pasagjerët, bagazhet dhe ekuipazhet. Katër avionë marrin kërcënime për bomba në Pragë, policia: Nuk po e nënvlerësojmë rrezikun Edhe në Republikën Çeke, katër avionë që udhëtonin drejt Pragës morën kërcënime për bomba. Policia çeke njoftoi përmes rrjetit social X se autoritetet po përgatiteshin për uljen e avionëve dhe për kontrollet e nevojshme. Sipas vlerësimit të policisë, besueshmëria e kërcënimeve ishte e ulët. “Megjithatë, ne nuk po e nënvlerësojmë kërcënimin. Për këtë arsye janë aktivizuar të gjitha masat e nevojshme të sigurisë, duke u përpjekur që ndikimi te pasagjerët dhe operacionet aeroportuale të jetë sa më i vogël”, deklaroi policia. Autoritetet çeke sqaruan se pas uljes, të katër avionët do t'u nënshtroheshin kontrolleve nga ekipet e specializuara për lëndë shpërthyese. Ngrihen avionët luftarakë MiG-29 në Bullgari, tre fluturime nën alarm Në Bullgari, tre avionë pasagjerësh u përfshinë nga kërcënimet për bomba, duke bërë që të aktivizoheshin procedurat e sigurisë në aeroportet e Sofjes dhe Plovdivit. Sipas mediave vendase, të cilat cituan Ministrinë e Brendshme bullgare, Forcat Ajrore ngritën në ajër avionët luftarakë MiG-29. Dy avionë që vinin nga Kopenhaga dhe Madridi u ulën në aeroportin Vasil Levski të Sofjes, të shoqëruar nga avionët luftarakë. Pas uljes, autoritetet nisën kontrollet ndaj pasagjerëve dhe ekuipazheve. Një avion i tretë, i nisur nga Londra, u ul në aeroportin e Plovdivit. Deri në momentin e raportimit nuk ishte zbuluar asnjë objekt i rrezikshëm në bordin e këtyre avionëve. Autoritetet bullgare po kryejnë verifikime për të zbuluar origjinën e kërcënimeve, të cilat ishin dërguar përmes postës elektronike. Alarm edhe në fluturimin Varshavë-Bruksel, një tjetër avion ndalohet në pistë Një tjetër kërcënim për sigurinë u regjistrua në fluturimin LO235 të kompanisë polake LOT, i nisur nga Varshava dhe që mbërriti mëngjesin e së enjtes në aeroportin e Brukselit. Pavarësisht alarmit, kontrollet nuk zbuluan asnjë objekt të rrezikshëm apo të dyshimtë në bord. “Pas një njoftimi për një kërcënim të mundshëm ndaj sigurisë, ekuipazhi u informua për situatën dhe kreu një kontroll sigurie në bord, sipas procedurave të parashikuara. Gjatë kontrollit nuk u identifikua asnjë objekt i dyshimtë”, sqaroi kompania LOT. Një tjetër avion i së njëjtës kompani, që ishte nisur nga aeroporti polak dhe do të udhëtonte drejt Parisit, mori gjithashtu një njoftim për praninë e mundshme të një objekti të rrezikshëm në bord. Sipas një zëdhënësi të kompanisë që administron aeroportet polake PPL, i cituar nga agjencia e lajmeve PAP, avioni u ndal ndërsa ndodhej në pistën e lëvizjes së avionëve. Autoritetet kontrolluan mjetin fluturues, por nuk gjetën asnjë pako të dyshimtë, siç konfirmoi më pas edhe një zëdhënës i LOT për agjencinë PAP. Dhjetë alarme për bomba vetëm të martën, përfshihen Ryanair, Wizz Air, SAS dhe LOT Incidentet e së enjtes vijnë pas një tjetër vale kërcënimesh të regjistruara të martën, kur rreth dhjetë fluturime në Europë u përballën me alarme për bomba. Sipas autoriteteve të vendeve përkatëse, në asnjë prej avionëve të kontrolluar nuk u gjet ndonjë mjet shpërthyes apo objekt i dyshimtë. Të paktën katër fluturime të kompanisë Ryanair ishin përfshirë në këto incidente, mes tyre edhe një tjetër avion që udhëtonte nga Dublini drejt Romës. Alarme u raportuan gjithashtu për avionë të kompanive SAS, LOT dhe Wizz Air. Kërcënimet sollën kontrolle sigurie, devijime të fluturimeve dhe mbyllje të përkohshme të disa aeroporteve. Në aeroportin Fiumicino të Romës, dy avionë të Ryanair iu nënshtruan kontrolleve të specializuara pas një njoftimi anonim për praninë e bombave. Një avion i kompanisë LOT, i nisur nga aeroporti Heathrow i Londrës, u devijua të martën nga aeroporti Varshavë-Chopin drejt atij Varshavë-Modlin. Edhe në Bullgari u kontrolluan dy avionë që mbërrinin në Sofje. Sipas policisë kufitare, kërcënimet për këto fluturime ishin dërguar përmes emailit në Ministrinë e Brendshme bullgare. Një ditë më parë, të hënën, një avion i Wizz Air, që ishte nisur nga aeroporti Luton i Londrës drejt Sofjes, ishte detyruar të kryente ulje emergjente në Budapest. Avioni ishte shoqëruar nga dy avionë luftarakë hungarezë. Ndërkohë, hetimet për kërcënimet e ditëve të fundit vijojnë. Autoritetet ende nuk kanë përcaktuar nëse bëhet fjalë për incidente të veçuara apo për një veprim të koordinuar./CorrieredellaSera U.D/ReportTv.al Alarm per bombe avioni fluturime Komento Komente Sondazhi i ditës: Cilin mbështesni në përplasjen politike që u hap? Ramën 55.9% Veliajn 22.7% Asnjërin 21.4% Vota total: 556 Sondazhi i ditës: Cilin mbështesni në përplasjen politike që u hap?
